Путин, Нетаньяху нар Трампын 20 зүйлт төлөвлөгөөг хэлэлцжээ

ОХУ-ын ерөнхийлөгч Владимир Путин, Израилийн ерөнхий сайд Беньямин Нетаньяху нар Даваа гаригт Ойрхи Дорнодын нөхцөл байдлын талаар утсаар ярьжээ. Кремлиэс мэдэгдсэнээр, удирдагчид АНУ-ын ерөнхийлөгч Дональд Трампын дэвшүүлсэн Газын зурваст энх тайвныг тогтоох 20 зүйлт төлөвлөгөөг хэлэлцсэн байна. Путин энэ үеэр Палестины асуудлыг зохицуулахыг дэмжиж буй байр сууриа дахин бататгасан гэлээ. Цаашилбал, тэд Ираны цөмийн хөтөлбөрт шийдэл олох, Сирийн тогтвортой байдлыг улам бататгах талаар ярилцжээ.

Путин, Нетаньяху нар хамгийн сүүлд өнгөрсөн наймдугаар сард утсаар ярьсан билээ.

Израилийн "KAN News" хэвлэлд саяхан мэдээлснээр Нетаньяху Орос, АНУ-ын ерөнхийлөгч нарын хоорондын хурцадмал байдлыг намжаахаар оролдож байгаа аж. Энэ хүрээнд Оросын талтай нягт хамтран ажиллаж байгаа гэх боловч Москва эсрэгээрээ Палестин, тэр дундаа Хамастай холбоо харилцаатай гэдгээрээ байнга сайрхдаг.

Орос, израиль иргэншилтэй Саша Труфановыг энэ оны эхээр барьцаанаас сулласан. Путин үүний дараа барьцаалагчдад талархал илэрхийлэхийн сацуу "Труфановыг сулласан нь Орос улс Палестин болон тэдний төлөөлөгчид, янз бүрийн байгууллагуудтай удаан хугацаанд холбоо харилцаатай байсны үр дүн. Түүнийг сулласан хүмүүнлэг шийдвэрийнх нь төлөө бид Хамасын удирдлагуудад талархах ёстой" гэжээ.

ЭХ СУРВАЛЖ: THE JERUSALEM POST