УИХ-ын гишүүн О.Алтангэрэл цаг үеийн асуудлаар байр сууриа илэрхийллээ.

Тэрбээр "МАН-ын намын хэрүүл, тэмцэл төр лүү орлоо. Эхлээд Засгийн газрын асуудал ярьж байсан. Одоо Монгол Улсын парламентын түүхэнд байгаагүйгээр УИХ-ын асуудал болж хувирлаа. Үндсэн хуульд заасанчлан УИХ бол төрийн эрх барих дээд байгууллага. Миний бие ч мөн Засгийн газарт сайдаар ажиллаж байсан. Энэ үедээ УИХ-д хүндэтгэлтэй хандаж, ажиллаж байсан. Үе үеийн засгийн газар яг ингэж л ажиллаж байсан. Монгол Улсын парламентын түүхэнд нэг намын даргын төлөөх тэмцэл ингэж хурц түвшинд хүрч байсан удаагүй.

Хүйтний улирал ирж байна. Өвөлжилтийн бэлтгэл ажлаас эхлээд Монголчуудад тулгамдсан асуудал олон байна. Өдөр бүр төв талбайд 1000 багш жагсаж байна. Ахмадууд тэтгэвэр нэмээч ээ гээд өчнөөн хоног өлсгөлөн зарлаад сууж байна. Гэтэл үүнд хариулт өгөх хүн алга.

Хуучин бол улс төрийн хэрүүл засаг дээр очоод замхардаг байсан. Гэтэл энэ удаагийн хэрүүл дэгдэж явсаар Засгийн газар, УИХ-ын хоорондын асуудал болж байгаад харамсаж байна.

Энэ хүмүүс хоорондоо эрх мэдлийн төлөө тэмцэж байх хооронд Монгол Улсын төр суларч байна. Төсвийн төслийг хугацаандаа хэлэлцэх л ёстой. Гэхдээ Ардчилсан намаас төсвийг эргүүлэн татъя гэдэг зарчмын шийдвэр гаргасан. Бүлгийн гишүүний хувьд энэ шийдвэрийг дэмжиж байгаа. Энэ хагарал, тэмцлээ хурдан л шийдвэрлэх хэрэгтэй байна. Би аль ч бичигт гарын үсэг зураагүй. Гэхдээ өөрсдөө Засгийн газраа унагаах гээд явж байхад үүнийг нь хамгаалах гээд явж байх зарчим Ардчилсан намд байхгүй. Эрх баригч нам өөрөө Засгийн газраа унагаах гээд явж байгаа бол өмөөрөхгүй гэдэг зарчмын хатуу байр суурьтай байна.