Амтай бүхэн Дубай шоколад руу хошуурах боллоо гээд хэлэхэд нэг их буруудахааргүй болжээ. Арабын нэгдсэн Эмират улсын "Fix Chocolatier" компанийн үйлдвэрлэсэн тус шоколад анх гарсан цагаасаа хойш трэнд болсон.

Баялаг орцтой, өвөрмөц амттай энэ шоколадыг зарим хүн үнэ цохиж худалдаж авч байна, зарим нь гэртээ өөрсдөө хийж үзэж байна. Тэр бүү хэл, янз бүрийн брэндүүд, нарийн боов үйлдвэрлэгчид хүртэл трэнд дагаж, өөр өөрсдийн орцоороо төстэй бүтээгдэхүүн үйлдвэрлэх болжээ.

Дубай шоколадны гол орц нь ангаахай самар. Тэгвэл Дубай шоколадны галзуурлаас болоод энэ жил дэлхий дахинд ангаахай самарны хомсдол үүссэн гэдгийг Ираны үйлдвэрлэгч "Keinia" брэндийн зүгээс мэдэгдэв. Эрэлт огцом өссөн ч нөөц хязгаартай байсантай энэ нь холбоотой.

Үүний зэрэгцээ "Google" платформ дээрх Дубай шоколад гэсэн хайлт хүртэл огцом өсч, өнгөрсөн гуравдугаар сард оргилдоо хүрсэн байна. Энэ үеэс хойш хайлтын тоо хэмжээ огт буураагүй, тогтмол өсөлттэй байна.

Гэхдээ АНУ-д Дубай шоколад төдийлөн трэнд болоогүй бололтой. Зургадугаар сарын 28-ны байдлаар АНУ-ын сүлжээ дэлгүүрүүдээр 822,900 ам.долларын Дубай шоколад зарагджээ. Энэ хугацаанд зарагдсан нийт бүх төрлийн шоколадны үнэ 16.27 тэрбум ам.доллар. Эндээс харвал нийт борлуулалтад Дубай шоколадны эзлэх хувь тийм ч өндөр биш байгаа аж.