Өвөлжилт хүндрэх эрсдэлтэй аймгууд малаа эдийн засгийн эргэлтэд оруулж байна

Монгол Улсын хэмжээнд 2025-2026 онд өвөлжилт, хаваржилт хүндрэх эрсдэлтэй байгааг УОК-оос эртнээс анхааруулж, аймаг орон нутаг, малчин өрх бүр өвөлжилтийн бэлтгэл бэлэн байдлаа сайтар хангахыг анхааруулсаар байгаа. Тэгвэл гангийн эрсдэлийн үнэлгээгээр 21 аймгийн 330 сумын хэмжээнд маш их эрсдэлтэй 25 сум, их эрсдэлтэй 54 сум, дунд эрсдэлтэй 130 сум, бага эрсдэлтэй 129 сум, маш бага эрсдэлтэй хоёр сум байгаа ажээ.

Улмаар, Баруун аймгууд өвс тэжээлийн нөөцөө бүрдүүлж, мах бэлтгэн эдийн засгийн эргэлтэд оруулахад анхаарч ажиллаж байгаа гэнэ. Албаныхны мэдээлж буйгаар Увс аймагт 2,7 орчим сая толгой мал өвөлжиж, хаваржих урьдчилсан тооцоо гараад байгаагаас нийт малынхаа 30 хувийг эдийн засгийн эргэлтэд оруулахаар болжээ. Увс аймаг өнөөдрийн байдлаар 160 тн өвс, 50 тн тэжээл бэлтгэсэн байна.

Харин Ховд аймгийн хэмжээнд урьдчилсан дүнгээр 6,3 сая толгой мал өвөлжиж, хаваржихаар байна. Тус аймаг 60,8 мянган тн өвс, 3270 тонн гар тэжээл, 6790 тонн хужир шүү бэлтгэхээр төлөвлөсөн байна. Аймгийн хэмжээнд нийт 500 мянган толгой малыг эдийн засгийн эргэлтэд оруулахаар төлөвлөжээ.

Харин Завхан, Дорнод, Хэнтий, Сүхбаатар аймгуудаас Хөдөө аж ахуйн биржээр дамжуулан 450 тн өвс, 45 тн хивэг, 5 тн хорголжин тэжээл авах захиалгаа хүргүүлсэн аж.

Энэ жилийн өвөлжилтийн бэлтгэл байдал болон ургац хураалтын талаар ХХААХҮЯ-ны, Газар тариалангийн бодлогын хэрэгжилтийг зохицуулах газрын дарга Д.Есөн-Эрдэнээс тодруулахад тэрбээр, "Улсын хэмжээнд аравдугаар сарын 5-ны өдрийн байдлаар 140.2 мянган га-гаас 151.4 мянган тонн үр тариа, үүнээс 131.7 мянган га-аас 147.5 мянган тонн улаан буудай хураан авсан байна. Мөн 6.8 мянган га талбайгаас 63.5 мянган тонн төмс, 7.9 мянган га-гаас 95.1 мянган тонн хүнсний ногоо, 27.5 мянган га-аас 69.6 мянган тонн тэжээл, 17.6 мянган га-аас 7.6 мянган тонн тосны ургамал тус тус хураан авсан байна. Улаан буудайн хураалт 55.7 хувь, төмс 63.5 хувь, хүнсний ногооны хураалт 52.5 хувь, малын тэжээл 43.6 хувь, тосны ургамал 17.6 хувийн гүйцэтгэлтэй байна” гэлээ.

Нөгөөтэйгүүр, Монгол Улсын Шадар сайд, УОК-ын дарга С.Амарсайхан өвөлжилт хүндрэх эрсдэлтэй баруун аймгуудад ажиллаж холбогдох албан тушаалтнуудад тодорхой үүрэг чиглэлийг өгчээ.