ОХУ-ын армийн талд цэргийн тусгай ажиллагааны онцгой бүсэд нэг жил тулалдаад иргэншил, эрүүл мэндийн тусламж үйлчилгээ, мөнгө, газар авах боломжтой гэх зар сурталчилгаа 2024 оны эхэн үеэс Телеграмд харагдах болсон. Армид элссэн гадаадын иргэд болон тэдний ар гэрт паспорт олгоно гэх Путины зарлигийн дараа ийм зар сурталчилгаа нэмэгджээ. Энэ хүрээнд Оросын аяллын агентлагууд болон брокерууд дэлхийн өнцөг булан бүрээс цэрэг элсүүлж эхэлсэн юм.

Йордан улсын иргэн 54 настай Раед Хаммадын хувьд Орост ажиллаад, иргэншил, цалин авах зэрэг нь эх орондоо хэзээ ч хүртэхээргүй боломж байжээ. Иймд зарын дагуу холбогдож, улмаар визээ авах, Москва руу нисчээ. Бие муутай, ажилд орж чадахгүй байсан Хаммад огтхон ч бодож цөхөлгүйгээр шууд энэ шийдвэрийг гаргасан гэдгийг эхнэр нь хэлж буй. Гэхдээ нас нь ахимаг учраас байлдааны талбарт бус жолооч юм уу тогоочоор ажиллана гэж найдаж байжээ.

Харамсалтай нь, Орост очсон хойноо Хаммад огт орчуулагчгүйгээр 17 хуудас гэрээтэй танилцаж, Украины зүүн өмнөд хэсгийн фронтод томилогдсон байна. Түүнд утасныхаа “Google translate”-ийг ашиглах боломж ч олгоогүй аж. Цаашилбал, нэгэнт байгуулсан гэрээгээ цуцаллаа гэхэд 6000 ам.долларын торгууль төлөх ёстой болжээ.

Мэдээж Раед Хаммадтай ижил замналаар фронтод ирсэн эрчүүд олон бий. Ойрхи Дорнод, Африк, Өмнөд Ази, Зүүн Азиас маш олон эрчүүдийг ийм байдлаар ОХУ-ын армид элсүүлжээ.

Сарын дундаж цалин нь 300 ам.доллараас хэтэрдэггүй Египет зэрэг орны эрчүүдийн хувьд Орост тулалдах нь асар боломжийн цалинтай ажил болдог аж.

Тэдний 4-6 долоо хоногийн хугацаанд бэлтгэл сургуулилалтад хамруулсны эцэст дайны талбарт гаргана. Энэ хугацаанд тэд ойр зуурын команд зэргийг ойлгохтойгоо болдог. Иргэншлийн тухайд цэрэгт элсмэгц нь олгох бөгөөд зургаан сараас нэг жилийн хугацаатай тулалдсаны дараа хоёр долоо хоногийн цалинтай амралт авах боломжтой. Хэрвээ цэргүүд шархдах юм уу нас барвал цалин, иргэншлийг ар гэрийнхэнд нь олгоно.

Эрсдэл байгаа хэдий ч Орост тулалдах сонирхолтой эрчүүд олон байна. Тухайлбал, “Оросын анд нөхөр” нэртэй телеграм хуудас 22 мянган захиалагчтай байна. Мөн Бахжат гэх ирак эрийн ажиллуулдаг энэ төрлийн хуудас 30 мянга орчим захиалагчтай.