Хотын дарга Х.Нямбаатар 2024-2028 онд нийслэлд хот доторх анхны хурдны замын ажил, метроны төсөлтэй уялдуулан зах худалдааны төвүүдийг нүүлгэхээр төлөвлөсөн талаар танилцуулж байсан. Тэгвэл 2025 оны есдүгээр сард хотын дарга Х.Нямбаатар "Нарантуул" олон улсын худалдааны төвд хүн очихоо больсон байна, нүүлгэнэ гэж мэдэгдсэн билээ. Иймд манай сурвалжлах баг "Нарантуул" олон улсын худалдааны төвөөс энэ удаагийн сурвалжлагаа бэлтгэн хүргэж байна.

Ногоон хурганы арьс, нохойн битүү туурай хүртэл бий гэгддэг "Нарантуул" зах олны хөл хөдөлгөөнд дарагджээ. Ингэж хэлэхийн учир нь, ахмад настнуудын тэтгэвэр бууж, эмээ өвөө нар ач, зээ нартаа хавар, намрын хувцас авч өгч харагдана. Тэдний нэгийг Д.Дондог гэх ба 60 гаруй настай. Д.Дондог зээ хүүтэйгээ хамт амьдардаг бөгөөд гадаа хүйтэрсэн тул 10 настай хүүхдээ хувцаслах гэж "Нарантуул" худалдааны төвийг зорин иржээ. Тэрбээр, "Нарантуул захын үнэ бусад худалдааны төвийг бодвол харьцангуй хямд санагддаг. Тэгээд бас хувцасны олон сонголттой болжээ. Сүүлийн үеийн хүүхдүүдийн өмсөж зүүх, идэж хэрэглэх зүйл бид нарын үеэс эрс өөр. Ардчилал гараад хүн бүр тэгш эрхтэй болж, янз бүрийн хувцас хэрэглэл өмсөж, зүүх эрхтэй болжээ" гэв.

Хотын дарга Х.Нямбаатарын танилцуулснаар, 2024-2028 онд нийслэлд хот доторх анхны хурдны замын ажил, метроны төсөлтэй уялдуулан зах худалдааны төвүүдийг нүүлгэхээр төлөвлөсөн. Энэ хүрээнд "Нарантуул", "Хархорин", "Да Хүрээ", 100 айл зэрэг томоохон худалдаа, үйлчилгээний төвүүдийг нүүлгэнэ гэж нийслэлийн дарга нар 2007 оноос хойш ярьж байгаа. Туулын хурдны замыг 20-30 сарын дотор барьж дуусгана гэх тооцоолол бий. Тиймээс нийслэлээс Нарантуул захын удирдлагуудтай уулзаж, нүүлгэх санал тавьсан аж.

Энэ талаар Хотын дарга Х.Нямбаатар "Дэлхийн жишигт хурдны замынхаа орц, гарцан дээр томоохон худалдааны төвүүд байдаг. Манайх шиг айлуудынхаа сууршлийн бүсэд байрлалтай улс бараг л байхгүй. Нарантуул худалдааны төв 21 аймгийн хүнсний болон ахуйн бараа, малын эм хэрэгслийн бөөний төв болчихоод байгаа учраас Туулын хурдны замынхаа баруун хэсэгт буюу Туул голын хойд хэсэгт Нарантуул захыг шилжүүлнэ. Харин одоогийн газар дээр нь орон сууц барих зориулалтыг нь өөрчилж өгье гэдэг уулзалт, хэлэлцээрийг хийнэ. Тэгэхээр Улаанбаатар хот баруун талдаа нэг авто худалдааны төвтэй, зүүн талдаа нэг худалдааны төвтэй болно. Ирэх гурван жилийн хугацаанд замаа барьж дуусгах учраас энэ хугацаанд Нарантуул захыг байгуулах шаардлатай" гэж онцолсон юм.

Мөн "Нарантуул" олон улсын худалдааны төвд хүн очихгүй болсон байна, нүүлгэнэ гэж хотын дарга Х.Нямбаатар сүүлд мэдэгдсэн. Гэвч бодит байдал дээрээ "Нарантуул" худалдааны төвийн хөл хөдөлгөөн улирал солигдох үе, баяр наадмын үеэр ачаалал эрс нэмэгддэг талаар худалдаа эрхлэгч Б.Халиун хэлж байна. Б.Халиун "Нарантуул" захад лангуу ажиллуулаад 10 гаруй жил болж байгаа аж. Ингэхдээ хүнгүй үед доод талдаа 500 мянган төгрөг, дээд талдаа гурван сая төгрөг хийдэг ажээ. Тэрбээр хэлэхдээ "Хотын дарга Х.Нямбаатар Нарантуул захаар хүн орохоо байсан гэж хэлсэн байсан. Үнэхээр хүн орохгүй байгаа, худалдан авалт байхгүй байгаа эсэхийг өөрийн нүдээр ирж харах хэрэгтэй. Тэгж байж нүүлгэх талаар ярь. Нарантуул худалдааны төв бол олон улсын худалдааны төв, эндээс зүүн аймаг болон баруун аймгийн хүмүүс ирж худалдан авалт хийдэг. Тийм байхад хүнгүй болжээ гэж хэлж байгаа нь худал. Үнэхээр хүнгүй бол энд лангуу авч түрээс өгөх шаардлагагүй. Иймд худал мэдээллээр иргэдийн тархийг угаахаа болох хэрэгтэй" гэв.

Наймаачин У.Сүхболд хэлэхдээ "Миний хувьд сүүлийн 20 гаруй жил энд хүүхдийн тасаг дээр хүүхдийн хувцас зарж байна. Хотын даргын хийсэн мэдээллийг хэдэн газраас харсан. Хараад гайхаж байлаа. Үнэхээр очих хүнгүй болсон гэж хэлсэн байсан. Хотын дарга зах дээрээс худалдан авалт хийхгүй нь тодорхой. Тийм байхад өөрөө ирж авахгүй юм гэхэд өрөөл нэгэн ирэх замыг нь хааж болохгүй байх. Хотын даргыг өөрийн биеэр ирж үз гэж хэлмээр байна. Бид хүнгүй, ашиггүй бол өдөржин энд даарч суух шаардлага байхгүй. Ашигтай, худалдан авч нар байгаа болохоор энд сууж байна. Гэхдээ үнэхээр энэ хэсгийн талбайг чөлөөлж захыг өөр тийшээ нүүлгэнэ гэвэл өөр арга байхгүй байх. Х.Нямбаатар түцнүүдийг ямар аймар аргаар зөөж байгааг харсан учир тийм зүйл Нарантуул худалдааны төв дээр л битгий гараасай гэж хүсч байна. Хотынхоо сайн сайхны төлөө бол лангуугаа буулгаж чадна" гэлээ.

Харин наймаачин З.Ариунсүх "Нарантуул захыг нүүлгэх талаар 2007 оноос хойш яригдаж байгаа. Гэхдээ тэр үеэс хойш Нарантуул худалдааны төвийг зорин ирэх иргэдийн тоо цөөрсөн гэж хэлж болно. Нөгөө талаараа наймаа эрхчлэгчид цахим худалдааны эсрэг гарсан.  Харин зарим хэрэглэгч өөрийн гараар барьж, хүрч хувцас авах сонирхолтой байдаг. Тийм болохоор өнөөдөр хүртэл Нарантуул худалдааны төвийн зогсоол нь дүүрч, лангуу бүр дээр худалдан авалт хийхээр 2-3 хүн зогсож байна. Хүн бүр ашигтай ажиллана гэж байхгүй. Нэг нь өдөрт орлого сайн байхад өөр нэгэн лангууны наймаачин орлого муу байхыг үгүйсгэхгүй. Тийм байхад Нарантуул захыг хүнгүй болсон гэж хэлэх нь буруу. Үнэхээр хурдны зам баригдана гэж байгаа бол газрыг чөлөөлөх хэрэгтэй. Тийм байхад худал хэлж хүмүүсийг төөрөгдүүлэх шаардлага байхгүй. Бид түрээсээр үйл ажиллагаа явуулдаг хувь хүмүүс. Хотын дарга Х.Нямбаатарыг хөөсөн хөөгөөгүй үнэхээр хүнгүй бол өөрсдөө гараад явна. Даанч тийм биш байна. Хүмүүс Нарантуул дээр лангуу авах сонирхолтой хүмүүс бий.  Тийм байхад нүүлгэх ажиллагаа хийхийн тулд үйлчлүүлэгч байхгүй гэж байгаа нь инээдэм юм" гэлээ.

Мөн энэ талаар иргэн Х.Болор хэлэхдээ "Нарантуул зах бол хуучирсан зах. Бусад захууд шинэчлэгдэж байхад Нарантуул бол яг л хуучин өмхий үнэр ханхлуулсан захуудыг нэг. Энэ хэсгийн айл өрхүүдийн дийлэнх нь хог дотор байгаа мэтээр мэдрэмж авдаг байх. Манай нэг найзын Нарантуул замын Түмэн наст хотхонд байдаг байсан. Энэ хавьд архи уудаг хүмүүс олон байсан болохоор байршлаа өөрчилсөн. Нарантуул захыг нүүлгэхийг хувь иргэний зүгээс дэмжиж байгаа. Энэ хавьд шинэчлэл хийх цаг болсон" гэлээ.