Энэ долоо хоногийн Баасан гаригийн УИХ-ын чуулганы нэгдсэн хуралдаанаар Засгийн газрын гишүүнийг огцруулах, томилох асуудлыг танилцуулахаар товложээ. Тодруулбал, Ерөнхий сайд Г.Занданшатар өөрийн бүрэн эрхийнхээ хүрээнд УИХ-ын гишүүн Б.Энхбаярыг Хууль зүй, дотоод хэргийн сайдаар томилж, нүүрсний хулгайтай тэмцэнэ гэдгээ мэдэгдсэн юм.

Өнгөрсөн долоо хоногийн Баасан гаригт УИХ-ын чуулганы нэгдсэн хуралдаанаар Тамхины хяналтын тухай хуулийн төслийг хэлэлцэх товтой байсан ч хуралдаагүй. Энэ талаар Улсын Их Хурлын Ерөнхий Нарийн бичгийн дарга Б.Баасандорж мэдээлэл өгөхдөө “УИХ-ын байнгын хорооноос Тамхины хяналтын тухай хуулийн төслийн хэлэлцүүлгийг ирэх долоо хоногт болгож хойшлуулах санал гаргасан учраас өнөөдөр чуулганы нэгдсэн хуралдаан байхгүй. Энэ долоо хоногт УИХ-ын түвшинд Ажлын хэсэг дөрвөн удаа, Байнгын хороо есөн удаа, Түр хорооны нэг хуралдаан, Төсвийн төслийн хэлэлцүүлэг нэг удаа болсон.

Хүмүүс заримдаа чуулганы нэгдсэн хуралдаан яагаад хуралдсангүй вэ гээд яриад байдаг. Чуулган нь Байнгын хороо, дэд хороо, түр хороо, нам, эвслийн бүлгийн хуралдаанаас бүрддэг. Тэдгээр нь хуралдаж байна гэдэг нь чуулганы үйл ажиллагаа буюу чуулган хуралдаж байна гэсэн үг. Өчигдөр чуулганы нэгдсэн хуралдаанаар Хүнсний тухай, Хөдөө аж ахуйн тухай хуулийн төслийг хэлэлцсэн. Хүний хөгжил, нийгмийн бодлогын байнгын хороо энэ долоо хоногийн Мягмар гаригт хуралдаад, Тамхины хяналтын тухай хуулийн төслийн хэлэлцүүлгийг ирэх долоо хоногт хийе гэсэн санал гарсны дагуу түр хойшилсон. Байнгын хорооноос санал, дүгнэлт гарч байж чуулганы нэгдсэн хуралдаанд оруулдаг. Тиймээс эрх бүхий Байнгын хорооны санал, дүгнэлт гараагүй учраас энэ асуудал хойшлогдсон. Мөн Хянан шалгах түр хорооноос үргэлжлүүлэн хэлэлцэх асуудал байна, түүний дараа чуулганы хуралдаанд хэлэлцүүлэх саналтай гэсэн учраас өнөөдөр хуралдаангүй. Ажлын хэсгүүд хуралдаад явж байгаа" гэдгийг хэлж байв.