Японы эрх баригч Либерал Ардчилсан намын даргаар эдийн засгийн аюулгүй байдлын сайд асан Такаичи Санаэ сонгогдлоо.

Тэрбээр намын даргын төлөө өрсөлдсөн нэр дэвшигчдийг ялж, “LDP” намыг тэргүүлсэн анхны эмэгтэй боллоо. Ингэснээр эрх баригч Либерал Демократик нам өнөөдөр (2025.10.04) албан ёсоор шинэ даргатай болов. Такаичи хэлэхдээ “Баярлах цаг биш, харин жинхэнэ сорилт одооноос эхэлж байна гэдгийг би мэднэ. Цаашдаа бидний хийх ажил уул мэт овоорч байгаа бөгөөд бүгдийнх нь дэмжлэгтэйгээр хамтдаа ажиллах ёстой. Та бүхэнтэй хамт би LDP-ийг илүү эрч хүчтэй, иргэдийн түгшүүрийг итгэл найдвар болгон хувиргадаг эерэг нам болгохын төлөө чармайн ажиллана” гэжээ.

Тэрбээр намынхаа суудлын тоо парламентэд буурч байгааг дурдаад, намын гишүүн бүр хичээнгүй ажиллах ёстойг онцолж, өөрөө бүр ч илүү ажиллах болно гэж мэдэгджээ. Мөн ажил амьдралын тэнцвэр гэх хэллэгийг үгийн сандаа дахин хэрэглэхгүй гэж онцолсон байна.

Намын даргын төлөө таван хүн өрсөлдсөн бөгөөд эхний шатны санал хураалтад:

• Эдийн засгийн аюулгүй байдлын сайд асан Такаичи Санаэ — 183 санал
• Хөдөө аж ахуйн сайд Коизүми Шинжиро — 164 санал
• Тэргүүн нарийн бичгийн дарга Хаяаши Ёшимаса — 134 санал
• Эдийн засгийн аюулгүй байдлын сайд асан Кобаяаши Такаяүки — 59 санал
• Намын нарийн бичгийн дарга асан Мотэги Тошимицү — 49 санал тус тус авчээ.

Үүний дараа Такаичи болон Коизүми нар хоорондын шийдвэрлэх шатны санал хураалтад оролцож, Такаичи 185 санал авч, Коизүмигийн 156 саналаас давж ялалт байгуулсан байна. Одоо тэр парламентын санал хураалтад оролцоно. Доод болон Дээд танхим хамтран Японы Ерөнхий сайдыг шийдвэрлэдэг. Эрх баригч эвсэл одоогоор аль ч танхимд олонхгүй байгаа ч сөрөг хүчний намууд нэгдэх эсэх нь тодорхойгүй байна. Хэрэв Такаичи энэ санал хураалтад ялбал Японы анхны эмэгтэй Ерөнхий сайд болж, түүхэнд тэмдэглэгдэн үлдэнэ. Энэ бол түүний намын даргын сонгуульд гурав дахь удаагаа нэр дэвшиж буй тохиолдол юм.