Ардчилсан намын шийдвэртэй холбоотой асуудлаар УИХ-ын гишүүн Х.Тэмүүжин мэдээлэл өглөө.

Тэрбээр, "АН парламентыг гацаасан зүйл байхгүй. Бид маш товчхон, тодорхой асуудлаар хуралдлаа. Ардчилсан намын өргөтгөсөн хурлаар Ардчилсан намын УИХ дахь бүлэгт чиглэл өгсөн. Тухайн чиглэлтэй холбогдуулан өнөөдөр Ардчилсан намын бүлэг ахин хуралдлаа. Ардчилсан намын улс төрийн зөвлөлөөс хоёр асуудлаар чиглэл өгсөн. УИХ дахь Ардчилсан намын бүлгийн гишүүд энэ хоёр асуудал дээр намын байр суурийг нэгдмэл байдлаар илэрхийллээ.

Нэгдүгээрт, УИХ-ын даргын нэр холбогдсон асуудал шийдэгдэх хүртэл УИХ-ыг даргалах нь зохимжгүй гэж үзэж байгаа. Үүнд ашиг сонирхлын зөрчил үүснэ гэж үзсэн. Тиймээс ашиг сонирхлын зөрчилтэй хүн УИХ-ыг даргалж байгаа үед Ардчилсан нам УИХ-ын хэлэлцүүлэгт оролцохгүй гэдэг чиглэлийг Ардчилсан намын УИХ дахь бүлэгт өгсөн.

Ардчилсан намын УИХ дахь бүлэг үүнийг хэлэлцээд, уг асуудалд нэгдмэл байр суурь илэрхийлсэн. Ямар ч тохиолдолд эргэлзээ байгаа бол үүний хажуугаар чимээгүй өнгөрч болохгүй. Тиймээс МАН-ын даргатай холбоотой асуудал шийдэгдэж дуустал, нөгөөтэйгүүр энэ асуудлуудад олон нийт итгэл үзүүлэх хүртэл УИХ-ын даргын суудалд Д.Амарбаясгалан гэдэг хүн суух нь зохимгүй гэж үзсэн.

Хоёрдугаарт, та бүхэн харж байгаа байх. Төр засаг үндсэндээ эзгүйрчихлээ. Ямар ч яамд, төрийн байгууллагууд ажлаа хийхгүй хүлээлтийн байдалд орчихлоо. Гэтэл яг энэ цаг үед төсөв хэлэлцэгдэж байна. Төсөв эзэнгүй болчихлоо. УИХ-д орж ирж байгаа сайд нар нь ч өөрсдөө итгэл үнэмшилгүй байна. Тиймээс эзэнгүй төсөвтэй холбоотой асуудлаа буцаан татах юм уу, ямар нэгэн байдлаар шийдээч ээ. Энэ асуудлыг шийдэхгүйгээр улс орны ажил урагшаа явахгүй. Бид парламентад хямрал авчрахгүй, ажлаа хийдгээрээ хийнэ. Гэхдээ энэ хоёр асуудлыг яаралтай шийдэх боломж юу байна гэдгийг эрэлхийлж байна.

Сүүлдээ эрх баригчдын буруутай үйлдэл даамжраад нэгнээ намнах хэрэгсэл боллоо. Ингэж авлигатай тэмцдэггүй юм. Бид хов живээр, сэтгэл хөдлөлөөр, таамгаар ажлаа хийхээ болих хэрэгтэй. Ардчилалд ямар ч тохиолдолд гарц байдаг. Үүнд Ардчилсан нам нэгдмэл байр суурьтай байна гэдгээ л өнөөдөр илэрхийлсэн гэв.