Хүн бүхэн компьютер дээр шивдэг болсон орчин цагт бидний бичгийн хэв бусдад хамаатай гэж үү? Тийм ээ, хамаатай. Ялангуяа та эмч бол бичгийн хэв тань бусдад хамгийн их хамаатай гэдгийг Энэтхэгийн шүүх нотолж байна. Эмч нарын ойлгомжгүй бичгийн хэвний талаарх элдэв инээдтэй яриа улс орон бүхэнд байдаг. Тэгвэл бичгийн хэвийг инээдэм наргианаас давуулж, нухацтай асуудал болгон дэвшүүлсэн тушаалыг Энэтхэгийн Пунжаб болон Харьяана мужийн Дээд шүүхээс гаргажээ.

Дээд шүүхийн тушаал бичгийн хэвтэй огт хамааралгүй хэргээс үүдэн гарчээ. Тодруулбал, хүчингийн хэргийн шүүх хурлын үеэр шүүгч Пури гэх хүн эмчийн үзлэгийн тэмдэглэлийг уншаад, ойлгож уншихын аргагүй байгааг нь хэлжээ. "Технологи хөгжсөн цаг үед засгийн газрын эмч нар одоо хүртэл аптекын хүмүүс л мэр сэр ойлгох гар бичмэлээр бичсээр байгаа нь гайхалтай" гэж шүүгч Пури хэлсэн байна.

Үүнээс улбаалаад анагаахын сургуулиудын хөтөлбөрт бичгийн хэв сайжруулах хичээлийг багтаах, хоёр жилийн дотор дижитал жорыг нэвтрүүлэх гэсэн шүүхийг шийдвэр гарчээ. Шийдвэр хэрэгжих хүртэл эмч нар том үсгээр ойлгомжтой бичнэ.

Энэ асуудлыг шийдэх арга зам хайж байгаа гэдгээ 330 мянга гаруй гишүүнтэй Энэтхэгийн Анагаахын холбооны ерөнхийлөгч доктор Дилип Банушали хэллээ. Энэтхэгийн томоохон хот, тосгодод эмч нар дижитал жор бичээд эхэлсэн боловч орон нутгийн жижиг бүс нутагт нөхцөл байдал арай өөр байна. Эмч нар том үсгээр ойлгомжтой бичиж болох ч өдөрт 70 өвчтөн үзэж байгаа хүнд энэ нь тийм амар биш гэдгийг доктор Дилип Банушали хэлжээ.