ОХУ-ын армийн томоохон цохилтын хариуд НАТО-ийн сөнөөгч онгоцнууд болон агаарын довтолгооноос хамгаалах ангиудыг бэлэн байдалд оруулжээ. Тодруулбал, ОХУ есдүгээр сарын 28-нд нэг шөнийн дотор 593 нисгэгчгүй онгоц, янз бүрийн төрлийн 50 пуужин харвасан. Украины агаарын довтолгооноос хамгаалах хүчин эндээс 566 нисгэгчгүй онгоц, 45 пуужинг нь буудаж унагасан байна.

Энэ удаагийн цохилтын гол төв нь Киев байжээ. Түүнчлэн Запорожье, Хмельницкий, Сумы, Одесса хотууд мөн халдлагад өртсөнийг Зеленский цахим хуудсандаа бичжээ.

Украины Дотоод хэргийн сайд Игорь Клыменкогийн мэдээлснээр улс орон даяар дор хаяж 70 хүн сүүлийн удаагийн агаарын цохилтоос болж нас барсан байна.

НҮБ-ын Ерөнхий ассамблейн чуулганы сүүлийн өдөртэй уг цохилт давхацсан. Тиймээс энэ нь ОХУ-ын хувьд байр сууриа тодорхой илэрхийлж буй явдал гэдгийг Зеленский хэлжээ.  Тэрбээр "ОХУ үргэлжлүүлэн тулалдаж, аллага үйлдсээр байхыг хүсч байна. Тэд дэлхийн улс орнуудын зүгээс хамгийн хүнд дарамт шахалтыг л үзүүлэх хэрэгтэй. Бид АНУ, Европ, Их-7, Их-20-ийн зүгээс хүчтэй хариу үйлдэл хүлээж байна" гэсэн юм.

Польшийн Үйл ажиллагааны командлалаас мэдэгдэхдээ "Украины нутаг дэвсгэрийг онилсон ОХУ-ын алсын тусгалын нисэх хүчний үйл ажиллагааны улмаас Польшийн болон холбоотны нисэх хүчин агаарын орон зайд ажиллаж эхэллээ. Сөнөөгч онгоцууд, газар дээрх агаарын довтолгооноос хамгаалах систем, радарын тагнуулын ажиллагааг хамгийн өндөржүүлсэн бэлэн байдалд оруулаад байна. Эдгээр арга хэмжээ нь урьдчилан сэргийлэх шинж чанартай бөгөөд агаарын орон зай, иргэдийг хамгаалах, тэр дундаа аюулд өртсөн бүс нутгийн ойролцоох газруудыг хамгаалах зорилготой" гэжээ.

Дашрамд дурдахад, Оросын дронууд есдүгээр сарын 10-нд Польшийн агаарын орон зайд зөвшөөрөлгүй нэвтэрснээс хойш дахин ийм зөрчил бүртгэгдээгүй байна.