МАН-ын Бага хурал эхэллээ. УИХ-ын сонгуулийн сурталчилгааны 14 хоногийн адал явдлыг давж сенсаацилсан өнгөрсөн долоо хоногийн хугацаанд Монголын улстөрчдийн хэн нь хэн бэ гэдгээс эхлээд хэрэг наймаалцаж, өөр хоорондоо тохиролцдог гэдэг нь ч илчлэгдлээ.

Энэ тухай УИХ-ын дарга Д.Амарбаясгалан эргэж буцах нүүргүй мэт олон нийтэд нээлттэй ярьсан бөгөөд монгол төрийн бодлого ухаанаар бус ховоор явдаг нь түүний үгнээс, хийсэн мэдээллээс тодорхой болсон юм. Түүнчлэн тэрбээр Сүхбаатарын талбайд олон мянган залуус олон хоног жагсаж, орлогын эх үүсвэрийг нь шаардаж жагссан залуусын итгэл үнэмшлийг үгүйсгэж, “Би хүнээрээ байхыг хүсдэг. Хүнээрээ байж найзалсан найздаа муу хэлүүлэхгүй амьдрах юмсан гэж боддог. Би өнгөрсөн зургадугаар сард болсон МАН-ын Бага хурлын үеэр Ерөнхий сайд асан, МАН-ын дарга Л.Оюун-Эрдэнэтэй найзалсан хэвээр байх болно гэдгээ хэлсэн. Ерөнхий сайдаар ажиллах хугацаанд санал зөрөх, шүүмжлэх үе байсан. Гэсэн ч том зорилго дээрээ бид хамт байдаг” хэмээсэн нь шударга ёсны дуу хоолойноос бүлэглэлийн эрх ашгийг өндөрт тавина гэдгийнх нь нотолгоо болов.

Ингэж, шударга ёсыг нэхсэн залуусын жагсаалын үр дүнд огцорсон Ерөнхий сайд Л.Оюун-Эрдэнийг цаашид хамгаалж ажиллахаа илэрхийлсэн явдал нь олон нийтийг “Тэгвэл Д.Амарбаясгалан МАН-ын дарга болж гэмээнэ Ерөнхийлөгч Х.Баттулга МАН-ыг дахин далдаас удирдах нь” гэсэн дүгнэлт хийхэд хүргээд зогсохгүй МАН-ыг экс Ерөнхийлөгчөөс салгахыг хүсэж буй тус намын олон мянган гишүүдийн итгэл рүү ус цацсан хэрэг боллоо.

Ерөнхийлөгч асан Х.Баттулгын хувьд өдгөө Төгрөг нуурын орд болон мухар төмөр зам, нүүрсний хэрэг, Сайншандын аж үйлдвэрийн парк үр дүнгүй санхүүжилт зэрэг олон асуудлаар хууль хяналтын байгууллагад шалгуулж байгаа. Энэ үед нь Ерөнхий сайд асан Л.Оюун-Эрдэнэ өөрийн зөвлөхөөр томилоод зогсохгүй хуулийн хугацаандаа буух ёстой төрийн хамгаалалтыг нь сунган дархалж байсан нь түүхтэй. Энэхүү холбоог Ерөнхий сайд асан Л.Оюун-Эрдэнийн төрсөн ах “Херо” интертаймэнтийн захирал Б.Баатар удирдан зохион байгуулдаг нь ч аль хэдийн олонд ил болсон. Мөн өдгөө түүнтэй холбоотой “Гэрэгэ” товерийн 14 давхрыг хууль хяналтын байгууллагын оролцоотой шантаажилж авсан нь тодорхой болж, тус товерийн хөрөнгө оруулагч Т.Дүүрэн “Энэ хэргээс болж би хоригдож, асуудлыг нуун дарагдуулахын тулд надад өөр хэргээр ял өгсөн” хэмээн ил тод мэдэгдлээ. Хэрэг явдал ганц үүгээр зогсохгүй бусад хөрөнгө оруулагч, хувийн хэвшил төдийгүй эцэстээ төр захиргаа, хууль хяналтын байгууллагыг ч Ерөнхий сайд асан Л.Оюун-Эрдэнийн үед төрсөн ах, Ерөнхийлөгч асан Х.Баттулгын хайртай дүү, найруулагч Б.Баатар удирдан чиглүүлж, тушаан өгч, хүслээ биелүүлдэг байсан нь тодорхой болж эхэлж байна.

Гэтэл ийм үед УИХ-ын дарга Д.Амарбаясгалан цаашид Ерөнхий сайд асан Л.Оюун-Эрдэнэтэй хамтын улс төр хийнэ гэсэн нь Ерөнхийлөгч асан Х.Баттулга болон найруулагч Б.Баатарын нөлөөг МАН-д дархлахаа зарлаж буй хэрэг бөгөөд өнөөдөр МАН-ын Бага хурлын гишүүд тэдний нөлөөг эцэслэн хадгалах эсэхээ шийдэх өдөр юм.