Хөвсгөл аймгийн Тариалан сумын нутагт самар түүж яваад сураггүй болсон иргэнийг эрэн хайх ажиллагаа явуулж байгаа талаар ОБЕГ-аас мэдээллээ. Тодруулбал, Тосонцэнгэл сумын харьяат дөрвөн иргэн самар түүж байснаас есдүгээр сарын 21-ны өдрийн 15:00-16:00 цагийн орчим иргэн Э нь отгоосоо нэг км зайтай газарт түүсэн самраа сахиж үлдсэн бөгөөд хамт явсан хүмүүс нь самар түүгээд буцаж ирэхэд нь сураггүй болсон байсан тухай дуудлагыг есдүгээр сарын 22-ний өдрийн 14:40 цагт ОБЕГ хүлээн авчээ.

Тухайн иргэний алга болсон байршил Хөвсгөл аймгийн төвөөс зүүн хойд зүгт 230 км, Тосонцэнгэл сумаас зүүн хойд зүгт 130 км, Тариалан сумаас хойд зүгт 70 км зайтай.

ОБЕГ-ын харьяа Үндэсний аврах бригад, Хөвсгөл аймгийн Онцгой байдлын газар, Эрэн хайх, аврах салбар, Тариалан сум дахь Гал түймэр унтраах, аврах 46 дугаар анги, аймгийн Цагдаагийн газар, Тосонцэнгэл сумын Мэргэжлийн анги, Тариалан сумын Засаг даргын Тамгын газрын ажилтнууд есдүгээр сарын 24-ний өдөр тус иргэнийг эрэн хайх ажиллагааг зохион байгуулж, эрлийн ажил үргэлжилж байгаа аж.