Украины арми Даваа гаригийн оройноос Мягмар гаригийн үд хүртэлх хугацаанд ОХУ-д олон тооны нисгэгчгүй нисэх онгоцоор цохилт өгчээ. Энэ үеэр Москваг чиглэн явсан дор хаяж 46 нисгэгчгүй онгоцыг устгасан гэж Москва хотын дарга Сергей Собянин мэдэгдлээ. ОХУ-ын Батлан хамгаалах яамны мэдээлснээр нийт 236 нисгэгчгүй онгоцыг устгасан аж. Энэ нь есдүгээр сарын 12-ноос хойших өдөр тутмын хамгийн өндөр үзүүлэлт юм.

Украин нисгэгчгүй онгоцуудаараа ОХУ-ын Бүгд найрамдах Татарстан улсын Елабуга хот болон Москвагаас зүүн зүгт 900 гаруй км зайд орших газрыг онилсон бололтой.

Елабуга нь Алабуга эдийн засгийн тусгай бүсэд байрладаг. Тус бүсэд Оросын алсын тусгалын нисгэгчгүй онгоц үйлдвэрлэх томоохон байгууламж бий.

Халдлагын үеэр Орос даяар нислэгүүд тасалджээ. Шереметьево, нуково, Домодедово, Жуковский, Ярославль, Саратов, Самара, Бегишево, Казань, Геленджик гээд нисэх буудал бүр тодорхой хэмжээгээр нөлөөлөлд өртсөн байна.

Энэ хугацаанд ОХУ-ын арми Украин руу гурван пуужин, 115 нисгэгчгүй онгоц харваснаас 103-ыг нь Киев саатуулжээ. Энгийн иргэдийн дэд бүтцийг онилсон тус цохилтоор Запорожьед нэг хүн, Одессад нэг хүн амиа алдсан байна.

Дашрамд дурдахад, Украины ерөнхийлөгч Зеленский Нью-Йоркт НҮБ-ын Ерөнхий ассамблейн 80 дугаар чуулга уулзалтад оролцож буй. Энэ өдрүүдэд тэрбээр 20 гаруй уулзалт хийх төлөвлөгөөтэй байна.