ОХУ-ын ерөнхийлөгч Владимир Путин 2026 онд дуусгавар болох цөмийн зэвсгийг хянах тухай шинэ "START" гэрээг нэг жилээр сунгах саналыг дэвшүүлжээ. Тухайлбал, олон газарт байршуулсан байлдааны хошууны тоонд дээд хязгаар тогтоосон АНУ-Оросын гэрээний хугацаа ирэх оны хоёрдугаар сарын 5-нд дуусгавар болох гэж байна. Гэрээний дагуу тус хоёр улс баллистик пуужин, стратегийн бөмбөгдөгч онгоц зэрэг хүчирхэг зэвсгийн системд хязгаарлалт тавихаар тохиролцсон байдаг.

Путин өчигдөр (2025.09.22) болсон Үндэсний аюулгүй байдлын зөвлөлийн хуралдаан дээр хэлэхдээ, "Манай улс 2026 оны хоёрдугаар сарын 5-наас хойш нэг жилийн хугацаанд гэрээний дагуу заасан тоон хязгаарлалтыг дагаж мөрдөхөд бэлэн байна. Гэхдээ энэ нь АНУ-аас ямар арга хэмжээ авахаас шалтгаална" гэжээ.

Украинд удаан үргэлжилсэн түрэмгийлэл нь тус улсад санхүүгийн хүнд дарамт учруулж байгаа тул Орос АНУ-тай зэвсгээр уралдахаас зайлсхийхийг хүсч байгаа бололтой. Шинэ "START" бол АНУ, ОХУ-ын хооронд байгуулсан цөмийн зэвсгийг хянах сүүлчийн гэрээ юм. Дунд тусгалын цөмийн зэвсгийн тухай гэрээний хугацаа 2019 онд дууссан. Энэ оны долдугаар сард АНУ-ын ерөнхийлөгч Дональд Трамп шинэ "START" гэрээг сунгах хүсэлтэй байгаагаа илэрхийлсэн. Трамп мөн өнгөрсөн сард Хятад, Оростой цөмийн зэвсгээс ангижрах яриа хэлэлцээг эхлүүлэх хүсэлтэй байгаагаа мэдэгдсэн байдаг.