Тээр жил Соёл, спорт, аялал жуулчлал, залуучуудын яам олон улсад цахиур хагалсан цахим спортын "The MongolZ" багийг үндэсний шигшээ багийн бүрэлдэхүүнд нэгтгэж, сүржин мэдэгдэл, мэдээг энд тэндгүй цацаж байв. Үр дүнд нь үнэндээ ашиг тус, үр нөлөө байсангүй. Харин ч сүүлийн шинэ сайд нь хэрүүлийн алим шидэж, "The MongolZ" багийг улс төртэй холбогдсон гэлээ. "The MongolZ" ч хариу мэдэгдэл гаргаж, улс төртэй холбогдоогүй, төрөөс мөнгө аваагүй гэдгээ илэрхийлсэн. Удалгүй зургаан сая төгрөгний асуудал яригдаж, түүнийг нь Монголын цахим спортын холбоо хандивд өгсөн гэдгээ мэдэгдлээ.

Төр, засгийн толгойд буй эрхмүүд цахим спорт гэхээр л "The MongolZ" гэж ойлгохоо болимоор юмсан. Цахим спорт нь дотроо "CS2", "dota2", "Mobile Legends", "PUBG", "LOL", "Valorant" гээд олон төрөл бий. Монголд эдгээр төрлүүдийн өчнөөн баг, тамирчид бий.

Сүүлд дахин 60 сая төгрөгийн асуудал гарч ирсэн. Тухайн мөнгө нь "IESF World Esports Championships 2025″ гэх олон улсын тэмцээнд оролцох Монголын баг, тамирчдын зардал болж хувирсан. Тус тэмцээн нь "CS2", "Dota 2", "PUBG Mobile", "MLBB" гэсэн дөрвөн төрлөөр болно. Одоохондоо тов нь тодорхойгүй байна. 

"The MongolZ"-д одоо төрөөс ямар ч дэмжлэг, санхүүжилт хэрэггүй. Шигшээ багийн тамирчин, дасгалжуулагч боллоо гээд сарын нэг сая гаруй төгрөгний цалин авдаг юм. Гэтэл энэ мөнгөтэй, мөнгөгүй "The MongolZ" байсаар ч ирсэн, байх ч болно. Харин тэр шигшээ багийн тамирчдад олгодог ногоон дипломат паспорт магадгүй арван жилийн өмнө "The MongolZ"-д хэрэгтэй байсан байх. Одоо тэдний нэрс өөрсдөө бренд болчихсон, тэмцээнд оролцох зардлыг цаад зохион байгуулагчид нь даадаг, багийнх нь орлого сая ам.доллар давчихсан учир аль ч орны, ямар ч виз асуудалгүй гарна. Тэрхүү Лондонд болсон тэмцээний талаар гэвэл "The MongolZ"-ийн тэмцээнүүдийн шахуу хуваарьтай холбоотойгоор виз мэдүүлэх боломжгүй нөхцөл байдал үүссэн. Виз мэдүүлэх хугацаа нь л давчуу байсан болохоос биш виз нь татгалзсан зүйл ерөөсөө байхгүй.

Сүүлдээ шигшээ баг гэх нэр зүүлгэчхээд төр, засгийн албан тушаалтнууд "The MongolZ"-ийг ярьж, олон нийтээс "ко" цуглуулдаг, анхааралд өртдөг болчив. Шигшээ баг боллоо гээд төрийн нохойд барьдаг мод болчихлоо гэвэл эндүүрэл. Эх орон, ард түмнээ л гэж тэд шигшээ багийн статустай явж байгаа. "The MongolZ чинь Монголын шигшээ баг ш дээ" гэх том мессежийг дагуулж байгаа юм.

Монгол Улс "The MongolZ" багийг бус, "The MongolZ" баг Монгол Улсыг олон улсад таниулж байна.

Төр, засаг дэмжихээр байсан бол хэдэн жилийн өмнө "GoMongolia" гэдэг нэрээ "The MongolZ"-ийн жерси дээр хадуулж, зохих төлбөрийг нь төлөх байлаа. Хаа хамаагүй Английн хөлбөмбөгийн дундаж багийн бэлтгэлийн хувцсан дээр бус дэлхийн "CS"-ийг байлдан дагуулж, шарууд, харууд, цагаанууд жерсиг нь авах гэж оочерлон зогсч буй "The MongolZ" дээр, ядаж баруун, зүүн мөрнийх нь нэгэн дээр "GoMongolia"-оо байрлуулах байв.

Хичнээн Фулхэмийн фанатууд, Английн Премьер лиг сонирхогчид, англичууд Монголд ирсэн юм бэ?

"GoMongolia" төслийн хүрээнд сүржин нэртэй форум, үйл ажиллагаа зохион байгуулж, эцэст нь жуулчид татах бус Монголдоо баахан инфлюенсертэй л болсон гэхэд хилсдэхгүй. Үр дүн нь тодорхой бус иймэрхүү төсөл Монголыг дэлхийд таниулж буй баг, тамирчдаа дэмжсэн бол илүү бодит харагдах байлаа.

"The MongolZ"-ийн соёлын нөлөө дэндүү өндөр. Тэднийг тоглох өдөр улс орон даяар дэмжиж байна. Финалд шалгарвал бөөнөөрөө чуулж, зохион байгуулалтад орж байна. Өмнө нь олимпын алтан медалийн төлөөх барилдаан, тулаанд л ийм зүйл болж байсан байх. Дуунд хүртэл дурдагдаж, гудамж, талбай, барилга байгууламж дээр мөнхөрч, олон улсын хэвлэлүүд онцолж байна.

Гадныхан хүртэл "The MongolZ"-ийн тоглолтыг монголчуудтай хамт үзэхийг хүсдэг болжээ. Монголчууд үндэсний бахархал, хайрлах, хамгаалах зүйлтэй болсон.

Гэтэл төр, засгийнхан нь шигшээ баг гэх нэр зүүлгэсэн атлаа далдуур боомилж байдаг. Монголдоо "The MongolZ" баг "PGL", "BLAST", "ESL"-ийн том тэмцээний финалд тогловол ямар гайхалтай зүйл болох вэ? Тэднийг үзэх гэсэн хүмүүсийг багтаах сав олдох болов уу? Харамсалтай нь тэрхүү тэмцээнүүдийг гол санхүүжүүлэгч олон улсын спорт тааврын компаниудын зах зээлийг хумьчихсан. Зохицуулалт хэрэгтэй байсан болохоос биш хориг хэрэггүй байлаа. Тэгээд төр, засаг нь өөрсдөө санхүүжүүлж тэмцээн зохион байгуулж чадах уу гэхээр үгүй. Угаасаа татвар төлөгчдийн мөнгөнөөс дор хаяж хагас сая ам.доллар гаргана гэдэг амаргүй.

Угтаа "The MongolZ"-ийн нөлөөгөөр Монголын цахим спортын зах зээл томорч, үзэгч, сонирхогчид нэмэгдэж, олон улсын технологи, букмекер, тэмцээн зохион байгуулагчдын анхаарлыг татаж байсан.

Цагтаа Месси, Роналдогийн араас яригдаж, дэлхийн хамгийн өндөр үнэд хүрсэн хөлбөмбөгчин Неймар өчигдөр/2025.09.21/ нутгийнхаа багийг дэмжиж, "The MongolZ"-ийн тоглолтыг үзэв. Энэ стори л гэхэд багадаа сая хүнд хүрч байгаа.

Төр гараа дүрсэн салбар бүр л асуудал, бэрхшээлд унаж байна гэдэг үг үнэн бололтой. Ямар ч хэрүүл, маргаангүй байсан "The MongolZ"-ийг тойрсон хар хэл сүүлийн үед гарах болов. Шигшээ баг болголоо гэж зарласан атлаа ингэж араас нь дарамталж, тайлбар хүртэл гаргуулж байгаа бол тэр статусаа больсон нь дээр. Одоо "The MongolZ" Монголын биш дэлхийн баг болсон.