НЭМЭЛТ:

Монголын шигшээ баг дэлхийн аваргаа өндөрлүүллээ. Хэсгийн сүүлийн Аргентин болон Алжирын тоглолтод Аргентин хожсоноор хэсгээс нэгдүгээр байраар шалгарах эрхээ авсан бол Итали, Монголын багууд авсан оноогоо тоолоход Итали 79, Монгол 78 байсан учир Итали цааш шалгарчээ.

Хэрэв хоёр багийн дөрвөн тоглолтод авсан оноо тэнцэж 79 байсан бол хоорондын тоглолтын үр дүнгээр Монгол цааш шалгарах байсан юм.

Монголын залуучуудын шигшээ баг хэсгийн сүүлийн тоглолтдоо Алжирыг 21-15 гэсэн харьцаатай хожлоо. Тоглолтын тухайд Монголын баг хоёр онооны шидэлтийг багаараа сайн гүйцэтгэж, будагтай талбайд илүүрхэв. Ингэснээр тэд гурван хожил, нэг хожигдолтой болжээ. Удахгүй хасагдах шатанд шалгарсан эсэх нь тодорхой болно. Учир нь энэ хэсэгт Итали, Аргентин, Монгол гэсэн гурван баг бие биенээ хожиж, бөмбөгний зөрүү, хоорондын тоглолтыг харьцуулах шаардлага үүсэв.

Хятадын Шионган хотноо FIBA 3×3 сагсан бөмбөгийн 23 хүртэлх насны дэлхийн аварга үргэлжилж байна. Монголын залуучуудын эрэгтэй шигшээ баг өрсөлдөж байгаа бөгөөд өнөөдөр/2025.09.19/ хэсгийн гурав дахь тоглолтоо Венесуэлийн эсрэг хийж, 18-15 гэсэн харьцаатай хожлоо. Тоглолтын тухайд Венесуэлийн баг тоглолтын турш онооны илүү байсан боловч төгсгөлд Монголын баг онооны зөрүүг ойртуулж, улмаар Г.Болор-Эрдэнэ эгзэгтэй мөчид хоёр онооны шидэлтийг амжилттай болгож, багаа хожилд хөтлөв. Удахгүй тэд хэсгийн сүүлийн тоглолтоо Алжирын эсрэг хийнэ.

Тэмцээний эхний өдөр Монголын баг хоёр тоглолт хийснээс Италийг хожиж, Аргентинд хожигдсон билээ.

Монголын эрэгтэй шигшээ баг С хэсэгт Итали, Алжир, Аргентин, Венесуэль гэсэн дөрвөн шигшээ багтай багтсан.

Багийн бүрэлдэхүүнд:

• Э.Маргад
• Г.Дөлгөөн
• Г.Болор-Эрдэнэ
• С.Төгөлдөр нар багтжээ.