Өмнөд Солонгосын засгийн газар долоо хоногт 4.5 өдөр ажиллах хуулийн төсөл санаачилжээ. Үүнийг ерөнхийлөгч Ли Жэ Мён санаачилсан бөгөөд ажлын цагийг багасгаж, хөдөлмөрийн зах зээлийг илүү уян хатан болгох зорилготой. Ажлын цаг бууруулах дэмжлэгийн тухай хуулийг хэрэгжүүлсэн компанид татварын хөнгөлөлт болон бусад урамшуулал олгоно. Төлөвлөгөө гурван үе шаттай хэрэгжинэ. Тодруулбал:

• 2025 онд: Хуулийг баталж, туршилтын хөтөлбөр эхлүүлэх.
• 2026 онд: Урт цагаар ажиллуулахад хүргэдэг нэгтгэсэн цалингийн тогтолцоог хориглох.
• 2027 онд: Улс даяар ажлын 4.5 хоног ажиллах талаар хэлэлцэж эхлүүлэх гэсэн шат дамжлагатай байна.

Ерөнхийлөгч Ли Жэ Мёны үзэж буйгаар ажлын цаг богиносвол амьдралын чанар дээшилнэ. 2023 онд солонгос ажилчид дунджаар 1,874 цаг ажилласан нь Эдийн засгийн хамтын ажиллагаа, хөгжлийн байгууллагын гаргасан дундаж цагаас өндөр үзүүлэлт юм.

Гэсэн хэдий ч бизнесийн байгууллагууд энэ санааг эрс эсэргүүцэж, Өмнөд Солонгосын ажлын бүтээмж хөгжингүй орнуудтай харьцуулахад доогуур байгааг анхааруулжээ.

Цөөн цагаар ажиллах нь үйлдвэрлэлд сөргөөр нөлөөлж, зардлыг нэмэгдүүлж, өрсөлдөх чадварыг бууруулна гэж тэд үзэж байна. "SK Telecom", "Samsung Electronics" зэрэг томоохон пүүсүүд аль хэдийн уян хатан хуваарь санал болгож байгаа ч жижиг бизнесүүд нэмэлт зардал нь ашиг тусаас давах вий гэж эмээж байна. Энэхүү шинэчлэл нь ажлын байр бий болгож, жижиг пүүсүүдэд шинэ боломж олгоно гэж Засгийн газар мэдэгдэж байгаа ч олонх нь эргэлзсээр байна.