Францын тэргүүн хатагтай Брижит Макроныг эрэгтэй төрсөн, хүйсээ солиулсан трансжендер гэх цуу яриа гараад багагүй хугацаа өнгөрсөн. Тэгвэл Брижит Макрон төрөлхийн эмэгтэй хүн гэдгээ нотлох баримтуудыг цуглуулж, шүүхэд хандахаар бэлдэж байна.

Тэрбээр "cisgender" буюу эмэгтэй төрсөн, одоо ч эмэгтэй хэвээрээ байгаа гэдгээ шинжлэх ухааны үүднээс нотлох гэж байгааг түүний хуульч мэдэгдэв. Брижит Макронд энэ бүхэн эвгүй, тухгүй байх ч гэлээ нээлттэй байхаас өөр аргагүй байгааг мөн онцолсон юм.

АНУ-ын улс төрийн идэвхтэн, нөлөөлөгч Кэндис Оуэнс гэх эмэгтэй энэ оны хоёрдугаар сард Брижит Макроныг эрэгтэй төрсөн гэх мэдээллийг анх бичлэгээр түгээж байсан. Эммануэль Макрон, Брижит Макрон нар түүнийг нэр төрд нь халдсан гэж үзэн, Делавэрийн Дээд шүүхэд долдугаар сард нэхэмжлэл гаргасан юм.

Шүүхийн нэхэмжлэлийн дараа ч Кэндис Оуэнс Францын тэргүүн хатагтайг яах аргагүй эрэгтэй хүн гэж зүтгэжээ. Мөн нэхэмжлэлийг хэрэгсэхгүй болгохыг хүссэн байна. Уг нэхэмжлэл нь үг хэлэх эрх чөлөөг дарангуйлах, америк сэтгүүлчийг нэгдүгээр нэмэлт өөрчлөлтөөр хамгаалагдсан тайлбарынх нь төлөө шийтгэх гэсэн улс төрийн зорилготой үйлдэл гэж тэр мэдэгджээ.

Олны мэдэж байгаачлан Францын ерөнхийлөгч Эммануэль Макрон эхнэрээсээ 24 насаар дүү. Францын хойд хэсэгт орших Амьен хотын Ла Провиденс ахлах сургуульд багшаар ажилладаг, гурван хүүхдийн ээж Брижит 1993 онд 15 настай сурагчдаа дурласан нь Макрон байв. Макроныг 17 настай байхад эцэг эх нь Парис руу лицей сургуульд явуулжээ. Тухайн үед Макрон эргэж ирээд чамтай гэрлэнэ гэж Брижитэд амласан байна. Улмаар 2007 онд 29 настай Макрон 54 настай Брижиттэй гэрлэн, насанд хүрсэн гурван хүүхдийн хойд эцэг болсон юм.