"Монголынхоо хүүхэд залуусыг дэмжиж, хүсэл мөрөөдлийг нь биелүүлнэ"

АНУ дахь Монгол авьяас академиас AAU Volleyball 2026–ийн сонгон шалгаруулалтын бүртгэл албан ёсоор эхэлж байгаа талаар өнөөдөр /2025.09.18/мэдээлэл хийлээ. Ингэснээр 15, 16, 17 насны авьяастай эрэгтэй, эмэгтэй тамирчдад АНУ-ын AAU тэмцээнд өрсөлдөх боломж нээгдэх юм. Шалгарсан тамирчид АНУ-ын Иллинойс мужид нэг сарын хугацаанд мэргэжлийн багш нарын удирдлага дор бэлтгэл хийж, олон улсын тэмцээнд оролцох болно.

Төрийн соёрхолт, МУГЖ, продюсер Д.Отгонбаяр:

-АНУ-д 2017 оноос эхлэн үйл ажиллагаа явуулж байгаа Монгол авьяас академиас Монголын ирээдүй болсон хүүхэд залуус тэр дундаа волейболын спортоор сонирхон хичээллэдэг 15, 16, 17 насны авьяастай эрэгтэй, эмэгтэй тамирчдад АНУ-ын AAU тэмцээнд өрсөлдөх боломжийг нээхээр сонгон шалгаруулалтын бүртгэлийг эхлүүлж байна. Миний бие энэ төсөлд продюсераар ажиллаж байгаадаа баяртай байна. Би бол өөрөө урлаг соёлын хүн. Өнгөрсөн хугацаанд урлаг, спорт болон олон нийтийн арга хэмжээ, төсөлд гар бие оролцож ирсэн. "Хурд" хамтлагийн 30 жилийн ойн хүрээнд АНУ-д аялан тоглолт хийж байхдаа тэнд Монгол авьяас академийн хамт олонтой танилцсан.

Энэ академийн үүсгэн байгуулагч болон хамт олны зорилго нь Монголынхоо хүүхэд залуусыг дэмжиж, хүсэл мөрөөдлийг биелүүлэх байсан.

Тэр утгаараа надад маш сайхан санагдсан учраас энэ төслийг дэмжиж, хамтран ажиллаж байна. Ер нь Монголын хүүхэд залуус эрч хүчтэй, өөрийгөө цаг ямагт хөгжүүлэхийг зорьдог болсон. Миний үед АНУ маш хол санагддаг байсан бол орчин цагийн залуус маш ойр болсон. Тийм учраас Монгол авьяас академиас цаг үеэ олсон сайхан төслийг хэрэгжүүлэх гэж байгаа нь сайшаалтай. Бид нэгдэж нийлж энэ ажлыг хийх ёстой юм байна. Хүсэл мөрөөдлийн очоо асаах хүсэлтэй энэ олон хүүхэд залуусынхаа зам, гүүр нь болж яваа Монгол авьяас академийн хамт олонд баярлаж талархаснаа илэрхийлье. Тийм учраас эх орныхоо ирээдүй болсон олон хүүхэд залуус энэ хөтөлбөрт хамрагдаж, дэлхий ертөнцтэй танилцаасай билээ. Монгол авьяас академиас анх сагсан бөмбөгийн тамирчдын сонгон шалгаруулалтыг "Стар" клубтай хамтран зохион байгуулж, 50 гаруй хүүхэд нэг сарын хугацаанд очиж, бэлтгэл хийхийн хажуугаар байнгын тэмцээнүүдэд оролцож, амжилт гаргасан. Тэгвэл энэ удаа волейболын тамирчдыг сонгон шалгаруулах гэж байна.

АНУ дахь Монгол авьяас академийн төлөөлөн удирдагч Б.Хүдэрбаяр:

-Бид үүний өмнө 15, 16, 17 насны ангиллын тамирчдыг нэг сарын хугацаанд АНУ-ын AAU тэмцээнд өрсөлдөх боломжийг нээж өгсөн. Энэ удаа волейболын спортоор сонирхон хичээллэж байгаа хүүхэд залуусаа дэмжихээр эх орондоо сонгон шалгаруулалтын бүртгэлийг албан ёсоор эхлүүлж байна. АНУ-ын AAU нь өсвөр насны тамирчдын хамгийн том спортын холбоо юм. Тэнд олон төрлийн спортын өндөр түвшний тэмцээнийг зохион байгуулдаг. Монгол хүүхдүүд АНУ-д нэг сарын хугацаанд хөтөлбөрт хамрагдахдаа 4-8 тэмцээнд оролцож, ур чадвараараа шилдэг багш, дасгалжуулагчийн хараанд өртөж, тэтгэлэгт хамрагдах бүрэн боломжтой.

Сонгон шалгаруулалтад бүртгүүлж, оролцох хүсэлтэй бол Mongolian Talent Academy-ийн сошиал сувгуудыг дагаж, мэдээллүүдээ тухай бүрд нь aваарай.

Монгол Авьяас Академи нь 2017 оноос эхлэн АНУ-д үйл ажиллагаагаа явуулж, урлаг болон спортын салбарт авьяаслаг залуусыг нээн хөгжүүлж ирсэн байгууллага бөгөөд энэ академи нь АНУ дахь Монгол таун бүтээн байгуулалтын нэг хэсэг юм. Монголын залуу үеийн авьяасыг олон улсын тавцанд таниулж, АНУ-д өөрсдийн чадвараа сорин өрсөлдөх, дэлхийн түвшний сургалт, тэмцээнд оролцох боломжийг олгоно. Бид шилдгүүдийг тодруулж, залуусыг их сургуулийн тэтгэлэг хүртэх, АНУ-д суралцах үүд хаалгыг нээх гүүр болдог. Хүүхэд өөрийгөө олж нээх, өөртөө итгэх, хөгжих боломжийг бүрдүүлэх болон монгол хүүхдүүдийн ирээдүйг бүтээж, хүчирхэг нэгдлийг бий болгох нь бидний нэн тэргүүний зорилго.

АНУ-ын их, дээд сургуулиудын cпортын авьяас илрүүлэг, дасгалжуулагчид авьяаслаг тамирчдыг яг энэ тэмцээнээс хайж олж илрүүлэн, спортын тэтгэлэг санал болгодог. AAU нь жил бүр АНУ-ын өнцөг булан бүрээс мянга мянган хүүхэд оролцдог өрсөлдөөнтэй, нэр хүндтэй тэмцээн юм. Энэ бол зөвхөн тэмцээн биш, харин ирээдүйн спортын оддыг тодруулдаг томоохон талбар. AAU-д тоглосноор монгол хүүхдүүд урам зориг авч, энэ урам зоригоо эх орондоо түгээнэ. Тамирчид АНУ-д байх хугацаандаа долоо хоногт 1-2 тэмцээн, нэг сарын хугацаандаа 4-8 тэмцээнд тогтмол оролцож, өндөр түвшний өрсөлдөөнд туршлага хуримтлуулна.

ОУХМ, “Тэнгэрлэг Мустангс”клубын волейболын дасгалжуулагч С.Ганболд:

-Би анх Монгол авьяас академийг үүсгэн байгуулахад АНУ-д волейболын спортын дасгалжуулагчаар ажиллаж байсан. Энэ академийн хамт олон эх орондоо ирж, хүүхэд залуусаа дэмжих болсонд баяртай байна. Эцэг эхчүүдийн хувьд хүүхдийнхээ ирээдүйг дэмжиж, энэ сонгон шалгаруулалтад хамруулаарай гэдгийг зөвлөе. Монголдоо багш, дасгалжуулагчдыг сонгон шалгаруулж, тамирчдаа АНУ-д явахаас өмнө мэргэжлийн түвшинд бэлтгэл, сургуулилалт хийлгэнэ.

АНУ дахь мэргэжлийн сургалт Америкт очоод Монгол авьяас академийн туршлагатай дасгалжуулагч багш нар болон монгол дасгалжуулагч нартай бэлтгэл хийнэ.

Бэлтгэлийн спортын орчин волейболын өдөр тутмын бэлтгэлд хамрагдаж, довтолгоо, хамгаалалт, дамжуулалт зэрэг ур чадвараа тасралтгүй сайжруулах боломжтой бөгөөд фитнесс, үсрэлт, тэсрэлтийн бэлтгэл, спортын заал ашиглах орчныг бүрдүүлж, тамирчдын бие бялдар, тэсвэр хатуужилд анхаарна. Америкт мэргэжлийн волейболын талбайд бэлтгэл хийж, өндөр түвшний тоног төхөөрөмж, орчинд дасгал хийх боломжийг хангана. Байр, зочид буудал, амьдрах орчин тамирчид аюулгүй, тохилог зочид буудалд амьдарна. Өдөр тутмын амьдралын хэрэгцээ, тав тухыг бүрэн хангасан орчноос гадна багш, зохион байгуулагчдын хяналт, дэмжлэг дор хүүхдүүдийн аюулгүй байдлыг хангана.

Монголын волейболын спортын Гавьяат тамирчин, багш, дасгалжуулагч Л.Нарантуяа:

-Монгол авьяас академийн хамт олон өмнө нь сагсан бөмбөгийн спортоор хичээллэж буй хүүхэд залууст маш том боломжийг нээж өгч байсан бол энэ удаа волейболын спортоор хичээллэдэг хүүхэд залуусыг сонгон шалгаруулах гэж байна. Монголын волейболын спортын өсвөрийн тамирчид Ази тивээс гадна Европ тив рүү нэлээд хэдэн удаа тэмцээнд оролцоод ирсэн. Тэгвэл энэ удаа Америк тив рүү нэг сарын хугацаанд өсвөрийн тамирчдын ур чадварыг хөгжүүлж, тэтгэлэгтэй коллежид орох боломжийг олгож байгаа хамт олонд маш их баярлаж байна. Энэ удаагийн сонгон шалгаруулалтад 15, 16, 17 насны өсвөрийн тамирчид бүртгүүлснээрээ өөрийн ур чадвараа хэрхэн сайжруулж, ирээдүйн том зорилгоо тодорхойлоход том түлхэц өгөх бөгөөд сонгон шалгаруулалтын үе шат 2026 оны нэгдүгээр улирал хүртэл үргэлжилнэ.

Гэрэл зургийг О.Бат-Эрдэнэ