УИХ-ын гишүүн, Ардчилсан намын дарга асан Л.Гантөмөр намрын чуулганы нээлтийн үеэр сэтгүүлчдэд мэдээлэл өглөө.

Тэрбээр "Алт" хөтөлбөр болон бусад хөтөлбөрийг тогтвортойгоор хэрэгжүүлж, эдийн засгийн өсөлтийг тогтвортой хадгална. Харамсалтай нь, өнөөдөр бидний санаачилж байсан хурдны замын сураг гарахгүй, бүтээн байгуулалтын ажил эхлэхгүй байна. Мөн кокс химийн үйлдвэр ажилдаа орохгүй, иргэдийг төөрөгдүүлж байна. Багануурын үйлдвэрийг түшиглэн кокс химийн үйлдвэр барих төслөө хийсэн байсан. Харамсалтай нь өнөөдөр өөр орд газрыг түшиглэж хийх гэж байна. Баталсан байгаа төлөвлөгөөгөө хэрэгжүүлэх нь чухал байна. Тэгэхгүй бол ядуурал огт арилахгүй байна.

Бид хамгийн түрүүнд Засгийн газар ажлаа хийх хэрэгтэй гэж шаардана. УИХ бол ийм шаардлагыг хатуу тавиад явах ёстой.

Хоёрт, ирэх оны улсын төсөв маань ирэх оны хөгжлийн төлөвлөгөөг хэр ажил хэрэг болгох вэ гэдэг асуудал байна. Дарга нарынхаа зардлыг 15 хувиар бууруулна гэсэн зорилтыг хөгжлийн төлөвлөгөөндөө тавьсан. Төрийн өмчит компаниудын удирдлагын тоо хэмжээг 20 хувиар бууруулна. Нэг үгээр хэлбэл, төрийн өмчит компаниудын өгөөжийг 20 хувиар нэмнэ гэсэн үг. Энэ маань улсын төсөвт хэр тусгалаа олж байна вэ. Мөн 2026 оныг боловсролын жил болгож УИХ-аас баталсан. Улсын төсвөө зорилготой болгож, хоёр зүйлийг УИХ-аас зарчим болгосон. Нэгдүгээрт, улсын төсөв алдагдалгүй байя. Энэ дөрвөн жил өр үйлдвэрлэлийг зогсооё гэсэн. Хоёрт, тухайн жилийнхээ төсвөөр ач холбогдолтой ажлаа хийе гэсэн. Та бүхэн санаж байгаа бол 2025 оны төсвийг батлуулахдаа 30 гаруй төсөл дээр мөнгөө тавьж байсан. Өөрөөр хэлбэл, тодорхой дэд бүтцийн асуудлыг шийдвэрлэж, үйлдвэрлэл рүү шилжихийн тулд төмөр зам, эрчим хүчний эх үүсвэртэй байх ёстой. Харин 2026 оны төсөв боловсролын салбарт зарцуулах ёстой. Багш нарынхаа цалинг нэмж, энэ салбарын хөрөнгө оруулалтыг бүрэн дүүрэн батлах ёстой. Улсын төсөв алдагдалгүй байх зарчмаасаа хөдөлж болохгүй. Хоёрт, УИХ-аас орлогынхоо хэрээр амьдаръя гэж шийдсэн. Бид улсын төсвийг нэлээд сайн ярилцаж, алдагдалгүй батлах ёстой. Ардчилсан намын УИХ дахь бүлгийн даргыг сонгуулиар л сонгоно. Ардчилсан намын даргын бүртгэл хийгдсэний дараа бүлгийн даргыг сонгох ёстой гэж харж байгаа. Намын дарга Улсын Дээд шүүхийн хуралдаанаар бүртгэгдсэний дараа өөрөө бүлгийн даргаа нэрлэх эрхээ эдлэх ёстой" гэв.

Үүнээс гадна БНХАУ-тай нүүрсний алдагдалтай гэрээ хийсэн талаарх асуудалд өөрийн байр сууриа илэрхийлэхдээ "Монгол Улс нүүрс болон бусад бүтээгдэхүүнийг БНХАУ -ын зах зээлд борлуулах дэд бүтцийн асуудлыг шийдмээр байгаа юм. Бид тийм учраас хил холболтын асуудлыг шийдсэн. Хил холболтын асуудлыг шийдэхгүй болохоор цөөн хүмүүс баяжаад байна. Хамгийн эхэнд Тавантолгойн ордыг авсан хүмүүс буюу 10 хэдэн айл л баяжиж, өдөрт 1000 машин гаргаж тоглодог. Тийм учраас энэ тоглоомыг задалж байгаад хүмүүс шаралхаж байна. Нөгөө талаасаа өнөөдөр жишиг болж байгаа хэлцлүүд шинэ худалдан авагч дээр хийнэ. Энд цоо шинэ тоглоомын дүрэм гэж байхгүй. Аль нэг компанид бусдаас илүү давуу тал олгосон зүйл байхгүй. Хил холболт явна. Гэхдээ өнгөрсөн хугацаанд хийж байсан жишгээр хил холболт хийх шийдвэрийг Засгийн газар, УИХ гаргасан.

Тийм учраас мега төслүүдээ явуул. Ингэхгүйгээр Монгол хөгжихгүй ээ. Хэрвээ энэ баталсан мега төслүүдээ зогсоовол Монголын эдийн засаг энэ байгаа газраа гацна. УИХ өөрөө баталсан байгаа Засгийн газрын дөрвөн жилийн үйл ажиллагааны хөтөлбөрийг Засгийн газар ягштал хэрэгжүүл.

Тэгж байж үр дүн гарна. Манай Монголд нэг том дутагдал байдаг. Нэг өглөө босоод өөр юм бодож олоод Монголын асуудал болгож, Засгийн газраа ажлыг нь хийлгэдэггүй. Ийм буруу жишиг давтагдаж байна. Монголын эрх ашиг нэгдүгээрт учраас Монгол Улсын за бол андгай буйза гэдгийг олон удаа хэлсэн. Монголчууд дандаа хэлсэн ярьснаасаа буцдаг гэдэг олон улсын имижтэй болсон. Бид урт хугацаанд ажлаа төлөвлөмөөр байна. Миний хувьд эрх баригч намын дотоод ажилд оролцмооргүй байна. МАН-ын даргаа нээлттэй, ил тод сонгоно гэдэгт итгэж байна. Энэ сонгууль өөрөө төрийн бодлогыг ядуурал руу чирч болохгүй. Туулын хурдны зам, хил холболт, эрчим хүчний мега төслүүдийг зогсоож ерөөсөө болохгүй" гэсэн юм.