Германы гаалийн ажилтнууд Бямба гаригт (2025.09.13) Гамбург боомтоос 400 гаруй кг кокаин илрүүлж, холбоотой байж болзошгүй хоёр эрэгтэйг баривчилжээ. Баривчилгаа 13:00 цагийн орчимд болсон бөгөөд О’Свальдкай чингэлгийн терминал дээр уг хэргийг илрүүлсэн байна. Усан онгоцны зогсоолын ажилчид эл өдөр үл мэдэгдэх хоёр эрэгтэй усан онгоц руу 20 гаруй спорт барааны хайрцаг зөөвөрлөж байгааг анзаарч, гаалийн ажилтнуудад анхааруулсан байна. Тухайн хоёр эрэгтэй өөрсдийгөө боомтын ажилтан гэж хэлсэн ч ямар ч батлах баримт бичиг байгаагүй аж. Дараа нь тэд зугтахыг оролдсон ч баригдсан бөгөөд 20 гаруй хайрцгийг нь мөн илрүүлжээ. Улмаар үүнд 400 кг кокаин байсан аж.

Хойд боомт хот Гамбург нь Европ руу кокаин оруулах гол цэг аж. Тус хот нь Германы хамгийн том далайн боомт бөгөөд Европт Роттердам, Антверпенийн дараа ордог гурав дахь том далайн боомт юм. Өдөр бүр 23 мянга гаруй тээврийн чингэлэг Гамбург хотоор дамжин өнгөрдөг. Энэ жил Холбооны эрүүгийн цагдаагийн албаны (BKA) ерөнхийлөгч Холгер Мюнх Германд кокаин ихсэж байгааг анхааруулсан юм. Мюнх хэлэхдээ, Хойд Америкийн зах зээл ханасан тул хар тамхины худалдаа Европт илүү төвлөрч байна гэж мэдэгджээ.