Балба улсад үргэлжилж буй авлигын эсрэг жагсаалын улмаас нас барагсдын тоо 51 хүрчээ. Тэдний 21 нь жагсагч, ес нь хоригдол, гурав нь цагдаа, өөр 18 хүн байгаа талаар цагдаагийн байгууллагаас мэдэгдэв. Мөн бэртэж гэмтсэн хүний тоо 1300 хүрээд байна. Балбын арми үймээн самууны үеэр 100 гаруй буу хурааж авчээ.

Эмх замбараагүй байдлаас болж улс даяар шоронгоос оргосон 12500 гаруй хоригдол байна. Ойролцоогоор 13500 хоригдол оргосноос заримыг нь баривчлаад, эрх чөлөөтэй явж байгаа нь 12533 аж. Оргодлуудын зарим нь Энэтхэг рүү нэвтрэхийг завдсан бөгөөд Энэтхэгийн хилийн цэргүүд олон хүнийг баривчилжээ.

Гэхдээ Баасан гаригийн байдлаар байдал харьцангуй намжиж, дэлгүүр хоршоонууд эргэн нээгдсэн байна. Мөн гудамжаар явж буй цагдаа нар буу биш бороохой барьжээ. Гудамжинд өмнөхөөсөө цөөхөн цэрэг эргүүл хийж байгаа ч зарим зам хаалттай хэвээр байна.

Тус улсын ерөнхий сайд КП Шарма Оли огцорсон тул түүний оронд ерөнхий шүүгч асан Сушила Каркиг томилох магадлалтай байна. Яагаад гэвэл Сушила Каркиг авлигын эсрэг дуу хоолой гэж үздэг. Тиймээс жагсагчид буюу Z үеийнхний ихэнх нь түүнийг томилохыг зөвшөөрч байгаа аж.

Дашрамд дурдахад, Энэтхэг, Хятад хоёрын дунд оршдог Балба улс 2008 онд хаант засаглалаа халснаас хойш улс төр, эдийн засгийн тогтворгүй байдалтай тэмцсээр байна. Тус улсад ажлын байрны хомсдол хурцадмал хэмжээнд хүрсэн тул залуус ажил хайн өөр улс руу дүрвэдэг.