Төрийн албан хаагчийн тэтгэвэрт гарахад авдаг нэг удаагийн тэтгэмжийн зардалд 326 тэрбум төгрөг шаардана. Үүний 174.4 тэрбум төгрөгийг 2026 оны төсөвт тусгасан бол үлдэгдлийг 2027 он руу шилжүүлжээ. Энэ талаар Сангийн яамны Төсвийн бодлого, төлөвлөлтийн газрын дарга М.Санжаадорж мэдээлэл өгөхдөө "Хуулиараа заавал нэмэх ёстой тэтгэвэр, хүүхдийн тооны өсөлт гэх мэт бүх зүйлсээ тооцоод үзэхээр бидэнд нэг их наяд төгрөгийн зарлага байгаа. Шууд автоматаар нэмэгдэх зарлага шүү. Тэгэхээр нэг их наядын зарлагаа 580 тэрбум төгрөгт яаж багтаах вэ. Мэдээж төсвийн урсгал зардлуудаа хасна. Одоо хэл ам болж байгаа 36 сарын тэтгэмжийн асуудал байна. Энэ тэтгэмжид хамрагдах иргэдийн хүрээ өргөжсөн. Өмнө нь төрийн жинхэнэ албан хаагч буюу төрийн тусгай болон төрийн захиргааны алба хаагчдад энэ тэтгэмжийг өгдөг байсан. Гэтэл сүүлийн жилүүдэд эмч, багш нараас гадна олон хүн хамрагдах болсон.

Ийм хүндрэл үүссэн. Хоёр дахь асуудал нь орон нутагт чадвартай боловсон хүчнийг ажиллуулж, төрийн үйлчилгээг чанартай хүргэх зорилгоор таван жил тутамд нэг удаа тэтгэмж олгодог. Боловсролын яамнаас таван жилээ гурван жил болгож, хууль баталсан. Энэ тэтгэмжид гэхэд 140 тэрбум төгрөг шаардлагатай. Нийт 360 тэрбум дээр 140 тэрбум төгрөгийг нэмэхээр 500 тэрбум төгрөг төрийн албан хаагчид тэтгэмжид зарцуулах шаардлагатай. Бид тэтгэвэрт гарах нэг удаагийн тэтгэмж болох 36 сарын тэтгэмжийн тал мөнгийг нь 2027 он руу шилжүүлсэн. Үлдсэн тэтгэмжийг 2027 онд өгнө. Өөрөөр хэлбэл, тэтгэвэрт гарах хүсэлтэй хүмүүсээс регистрийн дугаарын дагуу яг гарах шаардлагатайд эхлээд тэтгэмж өгөх байдлаар олгоно. Ийм процесс өмнө нь 2017, 2018 онд эдийн засаг хүндэрч байхад болж байсан. Эхлээд эмч, багш нар гэхээсээ илүү цагдаа, хил, онцгой байдлын алба хаагчдын 36 сарын тэтгэмж хуримтлагддаг" гэсэн юм.