Францын ерөнхийлөгч Эммануэль Макрон батлан ​​хамгаалахын сайд асан Себастьян Лекорнуг шинэ ерөнхий сайдаар томиллоо. Өмнөх ерөнхий сайд Франсуа Байру парламентын доод танхимд итгэл үзүүлэх эсэх санал хураалтад ялагдал хүлээсний дараа түүний засгийн газар огцорсон. Энэ нь Францад өнгөрсөн оны нэгдүгээр сараас хойш дөрөв дэх Ерөнхий сайд солигдсон явдал юм. Ерөнхийлөгч Макрон Мягмар гаригт (2025.09.09) Лекорнуг ерөнхий сайдын албан тушаалд томилсон.

Өдгөө 39 настай Лекорнуг ерөнхийлөгч Макроны үнэнч хүмүүсийн нэг гэж үздэг.

Гэсэн хэдий ч тэрбээр нэгэн цагт баруун жигүүрийн намд харьяалагддаг байв. Баруун болон хэт барууны намуудын хууль тогтоогчдын хамгийн бага эсэргүүцсэн нэр дэвшигч бол Лекорну гэж орон нутгийн хэвлэлүүд мэдээлжээ. Лекорну ирэх санхүүгийн жилийн төсвийн төлөвлөгөөг дэмжихийн тулд өөр намуудтай яриа хэлэлцээ хийж эхлэх төлөвтэй байна.

Байру болон түүний засгийн газрын санхүүгийн сэргээн босголтын төлөвлөгөө сөрөг хүчний намуудын дэмжлэгийг авч чадаагүй тул огцрохоос өөр аргагүй болсон. Тиймээс Лекорнуд ирэх жилийн төсвийг батлах даалгавар амаргүй байж магадгүй юм.