Балба улсын иргэд улстөрчдийн авлига болон цахим сүлжээний хоригийг эсэргүүцэн жагсч, үймээн самуун дэгдсэнээр 22 хүн амь үрэгдээд байна. Сүүлийн хэдэн арван жилд тохиолдоогүй эмх замбараагүй байдал үүссэн учир Дотоод хэргийн сайд Рамеш Лехак Даваа гаригт засгийн газрын хуралдааны үеэр огцорсон билээ. Тэгвэл тус улсын ерөнхий сайд КП Шарма Оли мөн огцорч буйгаа мэдэгдэв.

Олон хүний амь үрэгдсэний дараа цахим сүлжээний хоригийг цуцалсан боловч нөхцөл байдал дээрдсэнгүй.

Өнөөдрийн байдлаар тус улс засгийн газрын байр шатсан, улс төрийн удирдагчдын гэр орон халдлагад өртсөн, Балбын баруун дүүргийн хоёр шоронгоос 900 хоригдол оргосон зэрэг муу мэдээтэй байна. Тухайлбал, Балбын Конгресс намын төв байр болон намын удирдагч Шер Бахадур Деубагийн гэрийг Мягмар гаригт шатаажээ. Дөрвөн удаа ерөнхий сайдаар сонгогдсон 73 настай КП Шарма Олигийн гэрийг ч бас шатаагаад байна.

Түүнчлэн ерөнхий сайд асан Жаланат Ханалын гэрийг шатаасны улмаас түүний эхнэр Ражялакми Читракар нас баржээ. Ар гэрийнхнийх нь мэдээлснээр түүнд түргэн тусламж үзүүлэхээр түлэнхийн эмнэлэгт хүргэсэн боловч шархаа даалгүй нас барсан байна.

Жагсагчид хямралыг далимдуулан төрийн болон хувийн өмчийг сүйтгэж, дээрэмдэж, галдан шатааж байна гэж Балбын армийн дарга буруутгав. Эмх замбараагүй байдал үргэлжилсээр байвал Балбын арми зэрэг аюулгүй байдлын бүх байгууллага нөхцөл байдлыг хяналтдаа авах үүрэг хүлээсэн гэж армийн дарга мэдэгдсэн ч чухам ямар арга хэмжээ авахыг тодорхой мэдэгдээгүй.

Ерөнхий сайд огцорсон ч түүнийг хэн орлох, дараа нь юу болох гээд бүх зүйл тодорхойгүй байна. Зарим удирдагч, сайд нар аюулгүйн хүчнийхний тусламжтайгаар нуугдсан гэх мэдээлэл байна.

Жагсагчид одоогоор авлигатай тэмцэх өргөн хүрээний уриалгаас өөрөөр тодорхой шаардлага тавиагүй байгаа аж. "Цахим платформуудын хориг бол зүгээр л цугларах шалтаг, уул шугамандаа иргэд авлигад төвлөрч байгаа. Бид улс орноо хуучин хэвд нь оруулмаар байна. Авлигыг таслан зогсоомоор байна" гэж нэгэн жагсагч хэлжээ.

Цахим платформуудыг хориглохоос хэдэн долоо хоногийн өмнө олон нийтийн сүлжээгээр улстөрчдийн хүүхдүүдийн тансаг амьдрал, авлигын хэргүүдийг харуулсан "nepo kid" гэх кампанит ажил өрнөсөн. Үүний дараа цахим сүлжээний хориг тавьсан нь иргэдийн дуу хоолойг дарах зорилготой байж магадгүй юм. Тодруулбал, Балбын эрх баригчид өнгөрсөн долоо хоногт Харилцаа холбоо, мэдээллийн технологийн яаманд бүртгүүлэх эцсийн хугацааг дагаж мөрдөөгүй 26 цахим платформыг хаах тушаал өгсөн. Ташаа мэдээлэл, үзэн ядсан агуулга, цахим залилантай тэмцэхийн тулд цахим платформуудад зохицуулалт хийх хэрэгтэй гэж засгийн газар энэ шийдвэрээ тайлбарласан юм.