Оросын төв банкны царцаасан хөрөнгийг хураах нь Европын эдийн засагт ноцтой хохирол авчирна гэж Бельгийн Гадаад хэргийн сайд Максим Прево анхааруулжээ. Тухайлбал, 2022 онд Орос улс Украин руу халдсаны дараа Европын холбоо Оросын төв банкны 200 тэрбум гаруй еврог царцаасан.

Уг хөрөнгөний ихэнх нь Бельгид байрлах олон улсын хадгаламжийн байгууллага "Euroclear"-т хадгалагдаж байна.

Зарим Европын холбооны улсууд уг хөрөнгийг бүрмөсөн хураах эсвэл эрсдэлтэй хөрөнгө оруулалтад оруулж, Украиныг дэмжихэд ашиглахыг хүсч байна. Харин Превогийн үзэж буйгаар Оросын хөрөнгийг хураах нь Европын санхүүгийн системд итгэх олон улсын итгэлийг ганхуулна, еврогийн нэр хүндэд хохирол учруулах бөгөөд санхүүгийн зах зээлд томоохон цохилт өгч, дараалсан уналт дагуулж магадгүй. Өнгөрсөн жил Европын холбоо болон Их-7 бүлэг хэлэлцэж, Оросын царцсан хөрөнгийн хүү болох 50 тэрбум ам.долларыг Украинд зориулж, ашиглах болсон.

Прево мөн уг хөрөнгийг эрсдэлтэй төсөлд зарцуулахгүй байхыг уриалж байна.

Учир нь хэрэв алдагдал гарвал Бельги улс ганцаараа хариуцлага хүлээх эрсдэлтэй гэжээ. Тэрбээр бусад улс орнууд, жишээ нь Хятад, Персийн булангийн орнууд Европт хийсэн хөрөнгө оруулалтаа татаж магадгүй гэж сэрэмжлүүлсэн.

Одоогийн байдлаар, Европын гадаад хэргийн сайд нар Копенгагенд уулзахдаа Оросын хөрөнгийг ашиглах талаар ярилцсан. Гэвч үүнийг Бельги, Герман хүчтэй эсэргүүцэж байгаа тул ойрын үед өөрчлөлт гарахгүй бололтой. Үүний оронд Европын холбоо хөрөнгийг царцаасан хэвээр байлгаж, Орос Украинд учруулсан хохирлыг төлсний дараа л буцаах өгөх арга замыг эрэлхийлж байна. Прево энэ хөрөнгийг ирээдүйд Украин дахин босоход ашиглахын тулд аль болох царцаасан хэвээр хадгалах ёстой гэдгийг онцлов.