3,595.72
Энэ жил Үндэсний их баяр наадмын тухай хуулиар аймаг болон түүнтэй адилтгах наадмын үндэсний бөхийн шөвгийн дөрвөн бөхөөс допингийн шинжилгээ авахаар хуульчилсан. Тодруулбал, Үндэсний их баяр наадмын тухай хуулийн шинэчилсэн найруулгыг 2022 онд баталсан. Хуулийн 21.5 заалтад "Аймгийн баяр наадам, түүнтэй адилтгах баяр наадмын бөхийн барилдаанд шөвгийн дөрөвт үлдсэн бөхөөс допингийн шинжилгээг 2025 оны баяр наадмаас эхлэн авна" гэж заасан байдаг. Хэрэв шинжилгээ авахгүй бол тухайн аймаг дахь үндэсний бөхийн барилдаанд амжилт үзүүлсэн бөхийн цол чимэг баталгаажихгүй гэдгийг албаныхан мэдээлж буй.
Ингэснээр 21 аймгаас гадна нийслэлийн Налайх, Багануур, Багахангай дүүргийн баяр наадмын үндэсний бөхийн барилдааны шөвгийн дөрөвт үлдсэн бөхчүүдийг допингийн шинжилгээнд хамруулна.
Шинжилгээний сорьцуудыг 2025 оны зургадугаар сарын 6-ны, долдугаар сарын 13-ны болон наймдугаар сарын 2-ны өдрүүдэд Дэлхийн Допингийн Эсрэг Агентлаг (WADA)-ийн итгэмжлэгдсэн Герман улсын Дрездены Спортын анализ болон спортын биохимийн институт рүү хүргэн өгч, лабораторийн шинжилгээнд хамруулсан байна.
Тодруулбал, Архангай аймгийн Дашийн Төрбаяр, Баянхонгорын Цэрэннадмидын Болдбаатар, Говьсүмбэрийн Оюунцэцэгийн Амгаланбямба, Дорнодын Сүхбаатарын Цогтсүмбэр, Өмнөговийн Болдбаатарын Сундуйжадамба, Төв аймгийн Энхболдын Чойням болон Эрдэнэбатын Гантөмөр, Хөвсгөлийн Энхбатын Мөнхтөр, Бат-Эрдэнийн Сүх-Эрдэнэ нараас допинг илэрч, барилдах эрхээ хасуулжээ.
Холбоотой мэдээ