Милан Кортинагийн өвлийн олимп эхлэхэд тун бага хугацаа үлдсэн энэ үед Украины ерөнхийлөгч Владимир Зеленский Олон улсын олимпийн хороо/ОУОХ/-ны шинэхэн ерөнхийлөгч Кирсти Ковентри утсаар ярьжээ. Энэ үеэр Зеленский Кирстиг дээд албан тушаалд сонгогдсонд баяр хүргэхийн сацуу ОУОХ-г өөрсдийн байр сууриа хадгалан Орос болон Беларусийг олимпод оролцуулахгүй байх ёстой гэсэн аж.

Украины ерөнхийлөгч яриандаа "Дайн эхэлснээс хойш Украины 600 гаруй тамирчид, дасгалжуулагчид Оросын довтолгоонд өртөж, амиа алдсан. Мөн 100 гаруй спортын барилга, байгууламж сүйрсэн" гэжээ.

Парисын олимпод Орос, Беларусийн тамирчдыг цагаан туган дор оролцуулсан бөгөөд яг үүнийг л Зеленский хүсч байна. Тэрбээр үргэлжлүүлэн "Бүхий л спортын уралдаан, тэмцээнд Оросыг оролцох боломжийг олговол тэд үүнийг төрийнхөө пропаганда болгон ашиглана. Үзэн ядалт, дайны суртал ухуулгын хэрэгсэл болгоно" гэв.

Харин Кирсти Ковентри "Бид эцсийн шийдвэрээ гаргаагүй байна. Милан Кортинагийн тухайд би ес болон арванхоёрдугаар сард хуралдсан гүйцэтгэх зөвлөлийн шийдвэрээс буцахгүй.  Гэхдээ бид Парисын олимп шиг л шийдвэр гаргах байх" гэсэн аж.

Парисын олимпод Оросын 15, Беларусийн 17 тамирчин цагаан тугийн дор, төрийн дуулал, туг далбаагаа ашиглахгүй оролцсон билээ.

Ерөнхийдөө ирэх өвлийн олимпод Орос, Беларусийн тамирчид оролцвол цагаан тугийн дор оролцох магадлал тун өндөр байна.

Саяхан ОУОХ-ны стратегич асан Терренс Бөрнс хэвлэлд өгсөн ярилцлагадаа "Олимпод Орос хэрэгтэй. Яг л АНУ, Хятад олимпод хэрэгтэй шиг. Олимпийн үзэл санаа бол ‘Бид бүгдээрээ хамт эсвэл хэн ч байхгүй’. Ийм л байх ёстой" гэжээ.