Индонезийн парламентын гишүүдэд асар их цалин урамшуулал олгодог атал иргэдийн амьжиргааны түвшин доогуур байгаад уурлаж бухимдсан иргэд жагсаал цуглаан өрнүүлээд багагүй хугацаа өнгөрч байна. Улс оронд нь үймээн самуун үүссэн тул Индонезийн ерөнхийлөгч Прабово Субианто Хятадын цэргийн парадад оролцохгүй гэж мэдэгдээд байсан билээ. Мөн тэрбээр хууль тогтоогчдод олгодог хөнгөлөлтийг болиулна гэж өнгөрсөн амралтын өдрүүдэд мэдэгдээд байв.

Гэсэн ч Лхагва гаригт Бээжин хотноо Хятадын дарга Ши Жиньпин, ОХУ-ын ерөнхийлөгч Путин нартай зэрэгцэн зогссон Прабово Субиантогийн  зураг цахим сүлжээнд нийтлэгдсэнээр эсэргүүцлийн жагсаал улам ширүүсчээ.

Нийслэл Жакарта хотноо Лхагва гаригт төрийн үрэлгэн зардал болон цагдаа нарын хүчирхийллийг эсэргүүцсэн олон зуун эмэгтэйчүүд шүүр барин жагссан байна. Төр, цэрэгжилт, цагдаагийн хэлмэгдүүлэлтийн шороог шүүрдэх хүслээ илэрхийлэн шүүр барьсан гэж Индонезийн эмэгтэйчүүдийн холбоо мэдэгджээ. Жагсагчид "Цагдаагаа шинэчилье" гэсэн уриа лоозон барьсан байв.

"Эсэргүүцэл бол гэмт хэрэг биш, харин иргэн бүрт байдаг ардчилсан эрх" гэж жагсагчдын нэг Мутиара Ика ярьжээ.

Индонезийн эмэгтэйчүүдийн холбоонд 90 эмэгтэйчүүдийн байгууллага, хөдөлгөөн, эвлэл, хүний ​​эрхийн байгууллага, уугуул иргэдийн нийгэмлэг зэрэг иргэний нийгмийн янз бүрийн төлөөлөл багтдаг. Эмэгтэйчүүд өнгөрсөн хугацаанд Индонезийн дэглэмийн эсрэг тэмцсээр ирсэн түүхтэй. Одоогийн жагсаалын нэгэн адил эмэгтэйчүүд 1998 оны шинэчлэлийн хөдөлгөөн хүртэл Сухартогийн дарангуйлагч засаглалын эсрэг зогсч байжээ.