Өвөлжилтийн бэлтгэл ажлыг хангах хүрээнд 21 аймгийн Засаг дарга, УОК-ын холбогдох мэргэжилтэн, хөдөө аж ахуйн салбарын бусад албаныхантай цахимаар хуралджээ. Тухайлбал, өвөлжилт хүндрэх эрсдэлтэй байгаа баруун 5 аймаг, төвийн бүсийн зарим аймаг болон хадлангийн бүс болох зүүн гурван аймгийн өвөлжилтийн бэлтгэл ажлын талаарх мэдээллийг сонсож, есдүгээр сарын 15 гэхэд өвөлжилтийн бэлтгэл бэлэн байдлаа хангаж ажиллахыг аймаг орон нутгийн удирдлагуудад үүрэг болгожээ. Тухайлбал, баруун бүсийн нийт нутаг дэвсгэрийн 70-80 хувь нь гантай байгаа бөгөөд энэ жил 14.8 сая тоо толгой мал өвөлжих тооцоолол бий. Нэг үгээр баруун аймгууд өвс тэжээл импортоор худалдаж авах, хадлан тэжээл бэлтгэх шаардлага гарсан.

Монгол Улсын хэмжээнд 62.4 сая тоо толгой мал өвөлжинө.

Тиймээс отрын 9 бүсэд 653 мянган мал өвөлжих тооцоо судалгааг ХХААХҮЯ-аас танилцуулж байсан. 2025-2026 оны өвөл, хавар хүндрэх эрсдэлтэй учраас малчдыг малаа эдийн засгийн эргэлтэд оруулахыг анхааруулж буй. Урьдчилсан байдлаар 10 сая гаруй тоо толгой мал зах зээлд борлуулж дотоодын хэрэгцээг хангахаас гадна, экспортлох зохицуулалтыг хийж байгаа аж. Үүнээс гадна ирэх өвөл олон жилийн дунджаас илүү хүйтэн, хур тунадас их орох төлөв ажиглагдаж байгаа талаар холбогдох албанаас мэдээлж байсан.