Өмнөд Солонгосын тэргүүн хатагтай асан Ким Кён Хи 2023 оны гуравдугаар сард Ардын хүчний намын (PPP) удирдлагын сонгуульд нэр бүхий нэр дэвшигчийг дэмжихийн тулд Нэгдлийн сүмээс хамтран ажиллахыг уриалсан гэж тусгай прокурор Мин Жун Кигийн багийн бичсэн яллах дүгнэлтэд дурдсан байна. Хариуд нь Нэгдлийн сүм ерөнхийлөгч асан Юн Сук Ёлоос янз бүрийн бодлогын дэмжлэг авахыг хүсч байсан гэж прокурорын баг сэжиглэж байна.

Прокурорын багийн Даваа гаригт (2025.09.01) гаргасан яллах дүгнэлтэд дурдсанаар, сүмийн удирдагч Хан Хак Жа 2019 оны аравдугаар сард шашин, улс төр эв нэгдэлтэйгээр хамтрахыг уриалж, Африк, Камбож, Өмнөд Солонгос дахь цэрэггүй бүсийн энх тайвны парк болон НҮБ-ын Тамгын газрыг Өмнөд Солонгост байгуулах зэрэг ажлыг зохион байгуулахаар зүтгэж байсан.

Үүнээс гадна, прокурорын баг Нэгдлийн сүмийн түшмэл Юн гэх хүнд яллах дүгнэлт үйлдсэн.

Уг дүгнэлтэд, сүмийн удирдагч Хан Хак Жагийн  зааварчилгааны дагуу Юн нь ерөнхийлөгч асан Юн Сук Ёлыг тухайн үеийн ерөнхийлөгчийн сонгуульд нэр дэвшигчээр сонгосон. Ингэснээр улс төрийн үйл хэрэгт Нэгдлийн сүмийн бодлогын саналыг тусгах төдийгүй өндөр албан тушаалтнууд сүмтэй найрсаг харилцаа тогтоох боломжтой гэж төлөвлөсөн байсан талаар яллах дүгнэлтэд дурдсан байна.

Түүнчлэн Юн 2022 оны нэгдүгээр сард "PPP" намын төлөөлөгч Квеон Сон Дунд 100 сая вон буюу 72 мянган ам.доллар санал болгож, Юн Сук Ёлын сонгуульд дэмжлэг үзүүлэхийг хүссэн гэж сэжиглэж байна.

Үүний дараа Квеон Сон Дун 2022 оны хоёрдугаар сарын 8-нд Хан Хак Жатай уулзаж, Юн Сук Ёлыг дэмжиж буйгаа илэрхийлсэн байна. Мөн прокурорын гаргасан яллах дүгнэлтэд, Юн Сук Ёл болон тэргүүн хатагтай асан Ким Кён Хи нар "PPP" намын удирдлагын сонгуульд Квеон Сон Дунд дэмжлэг үзүүлэхийн тулд Нэгдлийн сүмээс туслалцаа авах талаар хэлэлцэж байсан гэж дурдсан байна.