Европын комиссын тэргүүн Урсула фон дер Лейений сууж явсан онгоцны навигацийн систем Оросын хөндлөнгийн оролцооноос болж тасалджээ. Тодруулбал, Урсула фон дер Лейен Ням гаригт Болгарыг зорьж явахад "GPS"-ын систем нь доголдсон байна. Гэхдээ онгоц аюулгүй газардаж чаджээ. Систем доголдсон нь Оросын илэрхий хөндлөнгийн оролцооноос үүдэлтэй гэсэн мэдээллийг Болгарын эрх баригчид өгчээ.

Нэрээ нууцалсан албаныхны мэдээлснээр Урсула фон дер Лейений онгоц навигацийн системийн доголдлын улмаас "Пловдив" нисэх онгоцны буудалд цаасан газрын зураг ашиглан газардахаас өөр аргагүй болсон аж.

Европын комисс энэ талаар мэдээлэл өгөхдөө "Заналхийлэл, айлган сүрдүүлэлт нь Оросын дайсагнасан үйл ажиллагааны байнгын бүрэлдэхүүн хэсэг. Энэ үйл явдал бидний батлан хамгаалах чадавхийг идэвхжүүлж, Украинд үзүүлэх дэмжлэгийг улам бататгана" гэлээ. Түүнчлэн Европын холбоо "GPS"-ын системд хөндлөнгөөс нөлөөлөх оролдлогыг илрүүлэх зорилгоор нам дор тойрог замд нэмэлт хиймэл дагуул байрлуулахаар төлөвлөж байна.

Харин Кремлийн хэвлэлийн төлөөлөгч Дмитрий Песков энэ мэдээллийг үгүйсгэжээ.

Болгарын Агаарын хөдөлгөөний үйлчилгээний газрын мэдээлснээр Орос, Украины дайн эхэлснээс хойш энэ мэтээр "GPS" төөрөгдүүлэх, доголдуулах ажиллагаа мэдэгдэхүйц нэмэгдсэн байна. Балтын тэнгисийн эрэг дагуух авиа компаниудад энэ төрлийн доголдол хэдэн арван мянгаараа бүртгэгдсэн гэлээ.