Хүйтний ам наашилж намрын сэрүү орж эхэллээ. Сургууль, цэцэрлэг эхэлж нөгөө л утаа, түгжрэл биднийг угтаж Улаанбаатарчуудын зовлон эхэлж байна. Гэтэл дайны хажуугаар дажин гэгчээр энд тэндгүй хуулсан хавтан хөглөрч, элс, шороотой замаар явахад хүндрэлтэй байна. Тодруулбал, бөхийн өргөөнөөс эхлэн офицеруудын ордон хүртэл замын хажуугийн явган хүний замыг хуулж, скүүтэр дугуйтай битгий хэл явган хүн явахад хүндрэлтэй нөхцөл байдал үүсчээ. Хүн хамгийн их цуглардаг Багшийн дээд орчим мөн ялгаагүй хэд хоногийн өмнөөс зарим хэсэгт явган хүний замыг хуулж ундуй, сундуй болгосон байна.  Угтаа явган хүний замыг засаж янзлах ажлыг өнгөрсөн хавар ярьж байсан. Өөрөөр хэлбэл, хотын дарга Х.Нямбаатар өнгөрсөн гуравдугаар сард "Их, Бага тойруу, Энхтайваны өргөн чөлөө, Наадамчдын гудамж, Олимпын гудамжны явган хүний замыг шинэчилнэ. Уг ажлын гүйцэтгэгчийг шалгаруулах тендерийг зарласан ч ААН-үүд оролцохгүй байна" гэж хэлж байв. Тэгвэл өнөөдрийн байдлаар буюу бараг хагас жилийн хугацаа өнгөрсөн ч албаныхан энэ үгээ хэлсээр. Тодруулбал, албаныхны өгсөн мэдээллээр Энхтайваны өргөн чөлөө, Их тойруу, Бага тойруу, Их Монголын гудамж болон Чингисийн өргөн чөлөө гэх мэт  нийт 210 мянган ам.метр явган хүний зам талбайг шинэчлэхээс 65 мянган ам.метр явган замыг өнөөдрийн байдлаар шинэчлээд байгаа аж.

Тэгвэл үлдсэн явган замын ажлыг дараа жилд шилжүүлж, ирэх хавраас шинэчлэлийн ажлыг үргэлжлүүлэх гэнэ. Энэ онд нийслэлийн төсвийн хөрөнгөөс 32 тэрбум төгрөгийг явган хүний замыг шинэчилж, засварлахад зарцуулна гэсэн мэдээлэл бий. Иргэдийн зүгээс эвдрэл гэмтэлгүй хавтангуудыг хуулж сольж байна гэх шүүмжлэлийг хэлсээр байгаа. Иргэдийн шүүмжлэл үнэн болох нь батлагдсан. Өөрөөр хэлбэл, Монголын залуучуудын эвсэл ТББ-аас АТГ-тай хамтран шинэчлэн засаж буй хавтангуудын чанар болоод хөрөнгө оруулалтад хяналт шалгалт хийсэн.

Ингэхэд зөвхөн Баянгол дүүрэгт гэхэд 12.5 тэрбум төгрөгийн төсөвт өртөг бүхий явган хүний зам, бордюр солих ажил хийгдсэн нь солих шаардлагагүй хавтангуудыг чанар муутай хавтангаар сольсон зөрчил илэрсэн байгаа юм.

Мөн бүтэн байгаа хавтангуудыг хэрхэн ашиглах нь тодорхойгүй. Дээрээс нь бүтээн байгуулалт хийж байгаа компаниуд нь тендерийн зарчмыг хангаж чадаагүй компаниуд шалгарсан байсныг илрүүлсэн гэжээ. Тухайлбал, техникийн үзүүлэлтийн шаардлага хангаагүй, мөн тухайн ажлын талбай дээр мэргэжлийн инженер  байхгүй байсан гэх мэт зөрчлүүд илэрснийг Монголын залуучуудын эвсэл ТББ-ын захирал З.Энхбаяр мэдээлж байж. Энэ мэт нийслэлийн зургаан дүүрэгт нийт 780 гаруй тонн ашиглах боломжтой хавтанг хуулсан гэж тус байгууллагаас мэдээлсэн. Өнөөдрийн байдлаар тендерт шалгарсан нийт 13 компани 13 байршилд зам засварын ажил гүйцэтгэж байгаа бөгөөд ажлын явц 50-95 орчим хувьтай үргэлжилж байна.

Нуухыг нь авах гээд нүдийг нь сохлов гэгчээр энэ мэт энд тэнд ундуй, сундуй нөхцөл байдал үүсгэж, яг ид ачааллын үеэр зүгээр байсан замыг хуулж орхисонд иргэд бухимдалтай байна.