Боловсролын сайд П.Наранбаяр өнөөдөр /2025.08.31/ Баянгол дүүргийн 26 дугаар хороонд орших 141 дүгээр сургуульд ажиллалаа.

Нийслэлийн 141 дүгээр сургуульд 5009 сурагч хичээллэхээр хуваарилагдсан бөгөөд энэ жил нэгдүгээр ангид 630 хүүхэд шинээр элссэн. Гэтэл сургуулийн ачаалал эрс нэмэгдсэнээс гурван ээлжээр хичээллэх, ингэхдээ нэгдүгээр ангийн нэг бүлэгт нь 70 сурагч хичээллэхээс аргагүй байдалд ороод буй. Иймд салбарын сайд нь зохицуулалт хийхээр ажилласан нь энэ.

Боловсролын сайд П.Наранбаяр “Наран сургуультай буурь залгаад CU болон Солонгос хоолны газар байр түрээсэлдэг юм байна. Түрээслэгчтэй нь өнөөдөр уулзаад түрээсийг нь дуусгаад төр түрээслэх боломжийг судалж байна. CU –тэй ярилцаж түрээсийг шийднэ. Энэ асуудал шийдэгдвэл таван ангид 10 бүлэг хичээллэж 141 дүгээр сургуулийн ачааллыг бууруулж хоёр ээлжээр хичээллэх боломжтой болно” гэлээ.