Индонези даяар хүчтэй эсэргүүцлийн жагсаал өрнөж байна. Үүний улмаас тус улсын ерөнхийлөгч Прабово Субианто ШХАБ-ын дээд хэмжээний уулзалтад оролцохоор Хятад улсад хийх гэж байсан айлчиллаа цуцалжээ. Тодруулбал, Баасан гаригт (2025.08.29) ажлын байрны хомсдол, цалин хөлсний тогтворгүй байдлын эсрэг жагссан байна. Гэвч жагсаал ширүүсэж, наад зах нь гурван хүн амиа алдаж, хэд хэдэн хотод олон нийтийн барилга байгууламж эвдэрсэн байна.

Тухайлбал, мотоциклийн жолооч цагдаагийн хуягт машинд дайруулж амь насаа алдсаны дараа жагсагчдын уур хилэн улам бүр нэмэгдсэн байна.

Жакарта, Макасар, Бандунг хотод эсэргүүцлийн жагсаал эрчимжжээ. Барилга байгууламжийг галдан шатааж, цагдаагийн газар руу дайрч, нийтийн тээврийн системийг хаажээ. Жакарта хотод жагсагчдыг доромжилсон хууль тогтоогчийн гэрт дээрэмчид дайран орсон байна. Мөн хэд хэдэн төлбөр хураамжийн төв, автобусны зогсоол, метроны буудлуудын байгууламж эвдэрсэн байна. Индонезийн аюулгүй байдлын хүчнийхэнд анархи үйлдлүүдийн эсрэг "хатуу арга хэмжээ" авахыг засгийн газраас тушаажээ. Үүний зэрэгцээ ерөнхийлөгч Прабово цагдаагийн үйл ажиллагаанд хариуцлага тооцно гэдгээ амлаж, амиа алдсан жолоочийн ар гэрийнхэнтэй биечлэн уулзсан байна.

Сошиал медиа платформуудаар жагсаалын дэмжиж, засгийн газрын шүүмжлэх контентууд нэмэгдсэн байна. Тухайлбал, "TikTok"-ийн шууд дамжуулгаар жагсаалын нөхцөл байдлыг харуулж байсан бүх хаягуудыг хаажээ. Мөн бусад технологийн компаниудаас жагсаалын тухай бүхий л контентыг устгахыг эрх баригчид хүсчээ.

Энэхүү эсэргүүцлийн жагсаал нь 10 сарын өмнө албан тушаалаа авсан Прабовогийн улс төрийн карьерт сөргөөр нөлөөлж байна.

Индонезийн эдийн засаг удааширч, олон мянган ажлын байр хомсдож, хэрэглээний зардал багассан нь иргэдийн бухимдлыг төрүүлж байна. Хүний эрхийн байгууллагууд, тэр дундаа Эмнести Интернэшнл хохирогчдод шударга ёсыг тогтоохын тулд цагдаагийн байгууллагын үйл ажиллагааг хараат бусаар мөрдөн шалгахыг уриалж байна.