Хойд Солонгос улс өнөөдөр /2025.08.30/ Украин дахь дайнд амь үрэгдсэн цэргүүд болон хилийн чанадад байгаа алба хаагчдад зориулсан хүндэтгэлийн арга хэмжээг хоёр дахиа зохион байгууллаа. Удирдагч Ким Жон Ун Лхагва гаригт болох Хятадын цэргийн парадад оролцох бөгөөд энэ үеэр Путинтэй уулзана. Үүнээс урьтаж цэргүүдэд хүндэтгэл үзүүлэх арга хэмжээг зохиосон нь Хойд Солонгосын золиослолыг харуулах зорилготой гэж үзэж байна.

Ким Жон Ун хүндэтгэлийн арга хэмжээний үеэр амь үрэгдсэн цэргүүдийг хөргийг төрийн далбаанд ороон ар гэрийнхэнд нь гардуулан өгчээ. Тэрбээр "Харь нутагт байлдааны талбарт амь үрэгдсэн офицер, цэргүүдийнхээ эрдэнэт амийг аварч чадаагүйдээ харамсаж байна" гэсэн байна.

Амь үрэгдэгсдийн гэгээн дурсгалд зориулж нийслэл Пёньяны Тэсон дүүрэгт шинэ гудамж барих төлөвлөгөөг арга хэмжээний үеэр анх удаа дэлгэв. Тус гудамжны нэр нь "Саебёл" буюу "Өглөөний од" гэсэн утгатай байх аж.

Мөн амиа алдсан цэргүүдийн хүүхдүүдийг хувьсгалт сургуульд сургаж, аав шигээ тууштай, зоригтой тэмцэгч болоход нь туслана гэжээ. Хувьсгалт сургууль гэдэг нь төрийн төлөө зүтгэсэн албан тушаалтнуудын хүүхдүүдийг намын гол албан тушаалуудад томилон дэвшүүлдэг тусгай боловсролын байгууллага юм.