Трампын засаг захиргаа Лос-Анжелес хотод эсэргүүцлийн жагсаал өдөөсөн танил тактикаа ашиглан ирэх долоо хоногт Чикагод цагаачлалын эсрэг томоохон ажиллагаа явуулахаар бэлтгэж байна. Эх сурвалжийн мэдээлснээр үйл ажиллагаа есдүгээр сарын 5-наас эхэлж магадгүй. Лос-Анжелесын баривчилгаанд хуягт машин, тактикын зэвсэг, хэрэгсэл багтсан. Үүнтэй ижил техник хэрэгслүүдийг Чикагод байрлуулах төлөвтэй байна.

Трамп сүүлийн хэдэн долоо хоногт Чикагод хотын гэмт хэрэгтэй тэмцэх зорилгоор Үндэсний гвардийг байршуулах гэж оролдсон. Ирэх долоо хоногийн ажиллагаа нь үүнээс тусдаа аж.

Иллинойс мужийн амбан захирагч Ж.Б.Прицкер, Чикаго хотын дарга Брэндон Жонсон нар энэ ажиллагааг эсэргүүцэж байна. Тэд "Ноён ерөнхийлөгч өө, Чикагод битгий ирээрэй. Таныг энд хэн ч хайгаагүй" гэж анхааруулжээ.

Эргэн сануулахад, Лос Анжелес хотод ажиллагаа явуулах үеэр нөхцөл байдал хурцадсан тул ерөнхийлөгч Трамп Үндэсний гвардын 2000 цэргийг илгээсэн билээ. Цэрэг байршуулах нь хурцадмал байдал, сөргөлдөөнийг нэмэгдүүлж, аюултай жишиг тогтооно гэж тухайн үед Латин Америкийн нэгдсэн иргэдийн лигийн (LULAC) дэд ерөнхийлөгч Хосе Баррера хэлж байв.