Персийн булангийн орнууд эсвэл Европын орнууд ОХУ-ын ерөнхийлөгч Путинтэй хийх хэлэлцээг зохион байгуулах боломжтой гэж Украины ерөнхийлөгч Зеленский мэдэгджээ. Энхийн хэлэлцээний асуудлаар Зеленский, Путин нар уулзаж магадгүй гэх яриа гарсан ч ОХУ-ын Гадаад хэргийн сайд Сергей Лавров ийм уулзалтын хөтөлбөр боловсруулаагүй гэсэн юм.

Харин Зеленский Мягмар гаригт мэдэгдэл хийхдээ "Турк, Персийн булангийн орнууд болон Европын орнууд гээд Оростой яриа хэлэлцээ хийх боломжтой орнуудтай энэ долоо хоногт харилцах болно. Манай талаас дайныг зогсоохын тулд бүх зүйлийг дээд зэргээр бэлтгэх болно. Дэлхийн удирдагчдын, ялангуяа АНУ-ын Орост шахалт үзүүлэх хүсэл зоригоос цаашид бүх зүйл шууд хамаарна. Орос улс бодит хэлэлцээг үргэлжлүүлэхээс зайлсхийж байгаа дохио л өгч байна. Үүнийг хатуу хориг арга хэмжээ, хатуу тариф, бодит шахалтаар л өөрчилж болно" гэжээ.

Дашрамд дурдахад, Украины Ерөнхийлөгчийн Тамгын газрын дарга Андрей Ермак тэргүүтэй төлөөлөгчид Катарт тус улсын Батлан ​​хамгаалахын сайдтай уулзахаар айлчилжээ.