Он гарсаар Монгол Улсын дотоодын зах зээлд зарим нэр төрлийн бараа, бүтээгдэхүүний үнэ огцом нэмэгдэж, өрхийн хэрэглээ, өдөр тутмын амьдралд шууд нөлөө үзүүлж байна.

Үндэсний статистикийн хорооноос гаргасан тоон мэдээнээс харахад, үнийн өсөлт нь хэд хэдэн хүчин зүйлээс хамаарч байна. Тухайлбал, импортын өртөг нэмэгдэх, тээвэр, логистикийн зардал өсөх, валютын ханшийн хэлбэлзэл болон дотоодын үйлдвэрлэлийн бууралт зэрэг эдийн засгийн суурь шалтгаанууд голлон нөлөөлжээ.

Хамгийн өндөр өсөлттэй бараа, бүтээгдэхүүн дунд суудлын автомашин дээгүүр эрэмблэгдэж байна. Учир нь суудлын автомашины үнэ өнгөрсөн жилийн мөн үетэй харьцуулахад 67 хувиар нэмэгдэж, дунджаар 1 сая төгрөгөөр илүү үнэтэй болжээ. Түүнчлэн дизель түлшний үнэ 20 хувиар өссөн нь дотоодын тээврийн зардлыг нэмэгдүүлж, нийт бараа бүтээгдэхүүний үнэд дам нөлөө үзүүлж байна.

Мөн барилгын материал 15 хувь, гэрийн тавилга 14 хувь, өргөн хэрэглээний хүнсний бүтээгдэхүүн болох талх, гурилан бүтээгдэхүүн 18 хувиар тус тус өссөн үзүүлэлт гарчээ.

Түүнчлэн гар утас, гэр ахуйн бараа, эрүүл мэндийн бүтээгдэхүүнүүд 7-9 хувийн өсөлттэй гарсан нь иргэдийн өдөр тутмын амьдралд үнийн дарамт нэмэгдэж буйн илрэл юм.