Туркийн тэргүүн хатагтай Эмине Эрдоган АНУ-ын ерөнхийлөгч Дональд Трампын гэргий Меланиа Трампт захидал илгээжээ. Уг захидалд Израилийн ерөнхий сайдтай холбоо барьж, Газын зурвасын хүүхдүүдийн зовлонг арилгахыг уриалсан талаар Анкарагийн эрх баригчид Бямба гаригт мэдэгдэв. Эмине Эрдоган энэ сарын эхээр Меланиа Трамп ОХУ-ын ерөнхийлөгч Владимир Путинд Украин, Оросын хүүхдүүдийн асуудлаар илгээсэн захидлаас сэдэл авснаа дурджээ.

“Таны 648 украин хүүхдийн төлөө гэх сэтгэл тань Газын зурвасын хүүхдүүдэд ч мөн адил хандана гэдэгт итгэлтэй байна” гэж Эмине захидалдаа бичсэн байна.

Мөн “Өнөөдөр дэлхий нийтээрээ сэрж, Палестиныг хүлээн зөвшөөрөх нь дэлхийн хүсэл зориг болсон. Энэ цаг үед таны Газын зурвасын өмнөөс хийх дуудлага Палестины ард түмний төлөө биелүүлэх түүхэн хариуцлага байх болно гэж итгэж байна” хэмээн Эмине захидалдаа бичжээ.

Дэлхийн өлсгөлөнгийн хяналтын байгууллага Баасан гаригт гаргасан дүгнэлтдээ Газа хот болон ойр орчмын бүс албан ёсоор өлсгөлөнд нэрвэгдээд байна гэж онцлон тэмдэглэсэн байв. Энэ нь цаашдаа улам тэлэх аюултай гэж анхааруулсан байна. Улмаар Израилийг Палестины нутаг дэвсгэр рүү илүү их хүмүүнлэгийн тусламж оруулахыг шаарджээ. Харин Израилийн ерөнхий сайд Беньямин Нетаньяху уг тайланг “илт худал” гэж няцаан, Израиль өлсгөлөн үүсгэх биш харин үүнээс сэргийлэх бодлого баримталдаг гэж мэдэгдэв.