Трампын засаг захиргаа АНУ-ын хүчинтэй визтэй 55 сая гаруй хүнийг албадан гаргахад хүргэж болзошгүй зөрчлүүдийг шалгаж байгаагаа Пүрэв гаригт /2025.08.21/ мэдэгдлээ. Ерөнхийлөгч Трамп албан тушаалд эргэн ирснээсээ хойш хууль бус цагаачид, оюутан болон зочны солилцооны визтэй хүмүүсийг албадан гаргахад анхаарч эхэлсэн.

Дотоодын аюулгүй байдлын яамны мэдээлснээр АНУ-д өнгөрсөн онд 12.8 сая ногоон карт эзэмшигч, 3.6 сая түр визтэй оршин суугч байжээ.

Төрийн департментээс гаргасан шалгуур үзүүлэлтэд зааснаар визний хугацаа хэтрүүлсэн, гэмт хэрэг үйлдсэн, олон нийтийн аюулгүй байдалд заналхийлсэн, аливаа хэлбэрийн террорист үйл ажиллагаанд оролцсон, террорист байгууллагад дэмжлэг үзүүлсэн гэх зэрэг зөрчилтэй бол АНУ-аас албадан гаргана.

Мөн арилжааны ачааны машины жолооч нарт ажиллах виз олгохоо зогсоох болжээ. Энэ шийдвэр нэн даруй хэрэгжиж эхэлснийг Төрийн нарийн бичгийн дарга Марко Рубио мэдэгдэв. АНУ-ын замд том оврын трактор, чиргүүлтэй ачааны машин жолоодож буй гадаадын жолооч нарын тоо нэмэгдэж байгаа нь иргэдийн амь насанд аюул учруулахын зэрэгцээ дотоодын жолооч нарын амьжиргаанд нөлөөлж байна гэж үзжээ.

Цаашилбал, энэхүү шийдвэр нь Америкийн аж ахуйн нэгж, байгууллагууд гадаад ажилчдыг хөлсөлж, авч үлдэхийг хориглох засгийн газрын нэгдсэн хүчин чармайлтын нэг хэсэг болох юм.

АНУ-д ирэхээр зорьж буй гадаадын иргэдийн дийлэнх нь удаан хугацаагаар суралцах, ажиллах хүсэлтэйгээр виз мэдүүлдэг. Үүний зэрэгцээ аялал жуулчлал, бизнесээр богино хугацаанд зорчих гэж байгаа бол виз авах шаардлагагүй 40 орон бий. Визнээс татгалзах хөтөлбөр гэх энэ боломжийг ашиглан тэдгээр улсын иргэд виз мэдүүлэхгүйгээр гурван сар хүртэл АНУ-д оршин суух боломжтой байдаг.