Энэтхэг улс цөмийн цэнэгт хошуу тээвэрлэх чадвартай, 5,000 км-ээс дээш тусгалтай "Agni-5" пуужинг амжилттай туршлаа. Энэ нь Хятад болон Пакистан зэрэг бүс нутгийн гол өрсөлдөгчдийг онилох чадвартай гэсэн үг. Туршилтыг зүүн бүсийн Одиша мужид явуулсан бөгөөд бүх техникийн үзүүлэлтүүдийг амжилттай хангасан гэж Энэтхэгийн Батлан хамгаалах яам мэдэгдэв. Энэхүү пуужингийн туршилт нь тус улсын ерөнхий сайд Нарендра Моди Хятад улсад олон жилийн дараа анх удаа айлчлахаар бэлдэж буй үед болж байгаа юм. Тэрбээр Шанхайн хамтын ажиллагааны байгууллагын (ШХАБ) дээд хэмжээний уулзалтад оролцохоор төлөвлөж байна.

Үүнээс өмнө Хятадын гадаад хэргийн сайд Ван И Шинэ Делид айлчилсан нь хоёр улсын харилцаа сэргэж болзошгүйг харуулж байна.

Энэтхэг, Хятадын харилцаа 2020 онд болсон хилийн цуст мөргөлдөөний дараа муудсан. Хэдийгээр хоёр улс шууд нислэгээ сэргээж, Төвөдөд орших Энэтхэгийн сүсэгтнүүдийн очдог мөргөлийн газруудыг дахин нээх зэрэг алхмууд хийж байгаа ч цэргийн түвшинд үл итгэлцэл хэвээр байна. Стокгольмын олон улсын энх тайвны судалгааны хүрээлэн (SIPRI)-гийн мэдээлснээр, Хятад улс 600 орчим цөмийн цэнэгт хошуу, харин Энэтхэг ойролцоогоор 180 цэнэгт хошуутай. "Agni-5" пуужингийн туршилт нь Хятадын цэргийн хүчин чадал нэмэгдэж байгаатай уялдуулан Энэтхэгийн зүгээс бэлтгэлээ базааж буйг харуулж байна.

Нөгөөтэйгөөр, Энэтхэг болон АНУ-ын харилцаа тодорхой хэмжээнд хөндийрчээ.

АНУ Энэтхэгийг Оросоос газрын тос худалдан авсан гэх шалтгаанаар буруутгасан. Улмаар Трампын засаг захиргаа Энэтхэгт өндөр тариф ногдуулж, сүрдүүлсэн нь асуудал дагуулжээ. АНУ-ын хувьд Энэтхэгийг Хятадын эсрэг стратегийн түнш болгохыг зорьж байгаа. Гэсэн хэдий ч эдийн засгийн дарамт үзүүлж буй нь Энэтхэг, Хятадыг харин ч ойртуулж байна гэж зарим шинжээч үзэж байна.  "Agni-5" пуужин нь мөн цөмийн зэвсэгтэй хөрш Пакистанаас сэргийлэх зорилготой. Энэ оны эхээр Энэтхэг, Пакистан хоёр сүүлийн хэдэн арван жилийн хамгийн хурц мөргөлдөөнийг хийж, харилцан хил даван цохилт өгсөн билээ. Пакистаны ерөнхий сайд ч мөн ШХАБ-ын дээд хэмжээний уулзалтад оролцохоор Хятад руу явах төлөвтэй байна. Пакистан нь Хятадтай гүн гүнзгий стратегийн харилцаатай бөгөөд “Нэг бүс, Нэг зам” санаачилгын хүрээнд томоохон дэд бүтцийн төслүүдэд хамтран ажиллаж буй. Мөн Пакистаны зэвсгийн импортын 81 хувийг Хятад хангадаг байна.