Украины аюулгүй байдлын баталгаатай холбогдох хэлэлцээнд ОХУ-ыг оролцуулахгүй бол юунд ч хүрэхгүй, дайны үндсэн шалтгаан гэж бидний тогтоогоод байгаа зүйлийг ойлгож чадахгүй гэж Сергей Лавров хэлжээ. ОХУ-ын Гадаад хэргийн сайд тэрбээр "Барууныхан, ялангуяа АНУ энэ аюулгүй байдлын баталгаатай холбогдох хэлэлцээнд Оросыг оролцуулахгүй бол юунд ч хүрэхгүй гэдгээ ойлгож байгаа гэдэгт итгэлтэй байна. ОХУ хууль ёсны ашиг сонирхлоо хамгаалахаас няцахгүй" гэсэн байна.

НАТО-ийн гишүүн 32 улсын цэргийн топ албан тушаалтнууд Лхагва гаригт цахим уулзалт хийх үед тэр энэ үгийг хэлжээ. Тэд Орос, Украины энхийн хэлэлцээний нэг хэсэг болох аюулгүй байдлын баталгааны асуудлыг хэлэлцсэн аж.

Путин Украины аюулгүй байдлын баталгааг хүлээн зөвшөөрсөн гэдгийг Трамп хэлсэн билээ. Тэрбээр АНУ-ын дэмжлэгт агаарын довтолгооноос хамгаалах систем багтаж болох ч цэрэг байршуулах тухай ам нээгээгүй. Франц, Их Британийн цэргийг байршуулах асуудал ч эртнээс нааш яригдсан. Гэхдээ Их Британийн ерөнхий сайд Кейр Стармер Мягмар гаригт мэдээлэл өгөхдөө цэрэг байршуулах тухай ярихад эрт байна гэжээ.

Түүнчлэн Путин энхийн хэлэлцээнээс зайлсхийсэн гэх ярианд Лавров тайлбар хийжээ. Тэрбээр "Путин хэзээнээсээ л Зеленскийтэй биечлэн уулзахад нээлттэй байсан. Манай ерөнхийлөгч АНУ-ын ерөнхийлөгчтэй утсаар ярисныхаа дараа яриа хэлэлцээг үргэлжлүүлээд зогсохгүй төлөөлөгчдийн түвшинг дээшлүүлэх санал дэвшүүлсэн. Бид бүх хэлбэрийн яриа хэлэлцээнд нээлттэй. Гэхдээ дээд хэмжээний уулзалтын үе шат бүрийг нарийвчлан бэлтгэх ёстой. Тэгж байж нөхцөл байдал дордохгүй, бодит дүгнэлт гаргаж чадна" гэжээ.

Мөн тэрбээр Цагаан ордонд Трамптай уулзсан Европын удирдагчдыг шүүмжлээд, тэдний хүчин зүтгэлийг АНУ-ын ерөнхийлөгчид нөлөөлөх гэсэн болхи оролдлого гэж нэрлэсэн байна.