ОХУ-ын Боловсролын яам Мягмар гаригт (2025.08.19)  Орос болон Украины эзлэгдсэн бүсүүдийн 100 гаруй цэцэрлэгт энэ намраас эхлэн төрөөс дэмжигдсэн “Эх оронч хичээл”-ийг туршилтаар нэвтрүүлж эхэлнэ гэж мэдэгдлээ. Энэхүү хөтөлбөрийг тус улсын ерөнхийлөгч Владимир Путин бүрэн дэмжсэн байна.

“Чухал яриа хэлэлцүүлэг” нэртэй эдгээр хичээлүүдийг анх 2022 онд Орос улс Украин руу бүрэн хэмжээний довтолгоо эхлүүлсний дараа, дунд сургуулиудад нэвтрүүлсэн. Өнгөрсөн жил Путин энэ хөтөлбөрийг цэцэрлэгийн насны хүүхдүүдэд хүртэл өргөжүүлэх шаардлагатай гэж мэдэгдэж байв. Ингэснээр эх оронч үзлийг илүү эртнээс төлөвшүүлнэ гэж онцлон тэмдэглэв.

Яамны мэдээлснээр, 3-7 насныханд зориулсан энэхүү хөтөлбөр нь есдүгээр сараас арваннэгдүгээр сар хүртэл үргэлжлэх бөгөөд ОХУ-ын 19 бүс нутаг, мөн Украины Донецк, Луганск, Запорожьегийн эзлэгдсэн хэсгүүдэд хэрэгжинэ.

Хүүхдүүдэд Оросын түүх, соёлыг хүндэтгэх, эх орноо хайрлах, гэр бүлийн үнэт зүйлс, сайхан сэтгэл, шударга байдал зэргийг заах ажээ. Боловсролын сайд Сергей Кравцов хэлэхдээ, насанд нь тохирсон шинэ гарын авлагууд нь хүүхдүүдэд амьдралын чухал үнэт зүйлсийн талаар зөв ойлголт төлөвшүүлэхэд тусална гэсэн байна. Мөн тэрбээр Чухал яриа, хэлэлцүүлгийг сурснаар хариуцлагатай иргэд болон өсөж бойжно гэж үзэж байна.

Харин шүүмжлэгчид энэ хөтөлбөрийг улс төрийн тархи угаалт хэмээн буруутгаж байна. Өмнө нь зарим цэцэрлэгт туршиж байх үеэр хүүхдүүдийг цэргийн дүрэмт хувцас өмсүүлж, тоглоомон зэвсэг бариулж, хуурамч шарх, боолт тавьсан тохиолдлууд гарч байжээ. ОХУ-ын хойд хэсгийн Вологда хотод уг хөтөлбөрийг 2024 оны нэгдүгээр сард цэцэрлэгийн хүүхдүүдэд аль хэдийн нэвтрүүлсэн байна.