Оросын Алтайн Бүгд найрамдах улсын дээд шүүх зургадугаар сард батлагдсан шинэчлэлийг хүчингүй болгох хүсэлтийг Даваа гаригт (2025.08.18) татгалзжээ. Уг шинэчлэл нь тосгон, суурин болон орон нутгийн удирдлагын эрхийг хасаж, бүс нутгийн захиргаанд илүү их эрх мэдэл өгөх тухай байсан тул олон хүн эсэргүүцэж байсан юм. Улмаар шүүхийн шийдвэр гарах үед хэдэн зуун хүн эсэргүүцлийн жагсаал хийсэн байна.

Нэхэмжлэл гаргасан хуульч, идэвхтэн Дмитрий Тодошев шүүхийн шийдвэрийг танилцуулсны дараа жагсагчид “Шүүгчид ичигтүн”, “Бид нэгдмэл, биднийг дийлэхгүй” гэж хашхирсан байна.

Тодошев дээд шатны шүүхэд давж заалдахаа мэдэгдэж, эцсээ хүртэл тэмцэхээ амласан. Жагсагчид түүнд талархлын бэлэг болгон уламжлалт Алтай малгай, бүс гардуулжээ. Алтай бол Оросын хүн ам хамгийн цөөн үндэстний бүгд найрамдах улс. Тус бүс нутагт 221,500 орчим хүн өргөн уудам хөдөө нутагт амьдардаг. Нийслэл Горно-Алтайскт 65 мянга орчим хүнтэй, ихэнх хүн тосгон сууринд амьдардаг тул шинэчлэл нь хурдан хугацаанд хэрэгжинэ гэж үзэж байжээ. Зургадугаар сард Горно-Алтайскт болсон эсэргүүцлийн жагсаалд 4,000 орчим хүн оролцсон нь сүүлийн жилүүдэд Засгийн газрын эсрэг олон нийтийн цуглааны цөөн жишгийн нэг болсон аж. Учир нь 2022 онд Украинд түрэмгийлэл эхэлснээс хойш эсэргүүцлийг Засгийн газар улам чанга дарах болсон билээ.