АНУ болон Өмнөд Солонгосын хамтарсан цэргийн сургуулилалт эхэлснийг Хойд Солонгосын удирдагч Ким Жон Ун хатуугаар эсэргүүцэв. Тэрбээр бүс нутгийн аюулгүй байдлын хүнд нөхцөл байдал нь Пхеньяныг цөмийн зэвсгээр хурдан хугацаанд зэвсэглэх шаардлагатай болгож байна гэж мэдэгджээ. “Родонг Синмун” сонинд мэдээлснээр Ким Даваа гаригт (2025.08.18)  өнгөрсөн дөрөвдүгээр сард бүтээгдсэн усан цэргийн шинэ сөнөөгч хөлөг онгоцны зэвсгийн системийн ажиллагааны туршилтыг ажиглажээ. Эл үеэр Ким АНУ ба Өмнөд Солонгосын цэргийн сургуулилалтыг “дайныг өдөөх гэсэн хамгийн тод илрэл” хэмээн тодорхойлсон бөгөөд “бүс нутгийн энх тайван, аюулгүй байдлын орчныг сүйтгэгч” гэж тодорхойлжээ.

Тэрбээр Хойд Солонгосын эргэн тойрон дахь аюулгүй байдлын нөхцөл байдал өдрөөс өдөрт улам ноцтой болж байна хэмээн онцлоод, одоогийн нөхцөл байдал Пхеньянаас “цөмийн зэвсэглэлээ хурдацтай өргөжүүлэх”-ийг шаардаж байна гэж мэдэгдэв. АНУ ба Өмнөд Солонгосын цэргүүд Даваа гаригт Солонгосын хойг дээр боломжит онцгой байдалд бэлтгэх зорилгоор хамтарсан сургуулилалтаа эхлүүлсэн. Харин талбайн сургуулилалтын тал хувийг ирэх сар хүртэл хойшлуулжээ.

Ажиглагчид үүнийг Хойдтой яриа хэлэлцээг сэргээхийг эрмэлзэж буй Өмнөд Солонгосын ерөнхийлөгч Ли Жэ Мёний засаг захиргааны алхам гэж үзэж байна. Гэсэн хэдий ч Пхеньян хамтарсан сургуулилалтад хариу арга хэмжээ авах боломжийг үгүйсгээгүй тул АНУ болон Өмнөд Солонгосын цэргүүд сонор сэрэмжээ улам чангатгасаар байна.