Дайныг зогсоох хэлэлцээ хийхийн тулд юун түрүүнд гал зогсоох шаардлатай гэж Украины тал үздэг. Тодруулбал, өнгөрсөн хугацаанд энэ нь Украины гол шаардлага байсаар ирсэн. Гал зогсоох нь Оростой цаашдын яриа хэлэлцээ хийх, эцсийн дүндээ урт хугацааны зохицуулалт хийх урьдчилсан нөхцөл гэж тэд үзэж буй.

Гэвч Трамп үүнийг төдийлөн сайшаахгүй байгаа бололтой. Тэрбээр гал зогсоох хэлэлцээр тэгтлээ шаардлагатай эсэхийг мэдэхгүй байна гэж хэлжээ.

Харин Европын удирдагчид гал зогсоох тал дээр Украинтай ижил байр суурьтай байна. Германы канцлер Фридрих Мерц "Дараагийн уулзалтыг гал зогсоохгүйгээр хийнэ гэж төсөөлж чадахгүй байна. Тэгэхээр үүн дээр ажиллацгаая. ОХУ-д шахалт үзүүлье" гэжээ.

Украины аюулгүй байдлыг хангах амлалтаа Трамп энэ удаад дахин баталсан боловч аливаа тусламжийн талаар тодорхой тоо хэмжээ зааж хэлсэнгүй. Гэхдээ сэтгүүлчид түүнээс "Украины аюулгүй байдлын баталгаа нь тус улсын нутаг дэвсгэрт байгаа америк цэргүүд байж болох уу?" гэж асуухад тэр үгүйсгэсэн зүйл хэлээгүй аж. Мөн "Европ бол хамгаалалтын эхний шугам. Гэхдээ бид ч бас оролцоотой байна. Бид сайн хамгаалалт өгөх болно" гэжээ. Аляскад болсон уулзалтын үеэр Путин Украины аюулгүй байдлын баталгааг хүлээн зөвшөөрсөн гэдгийг ч мөн Трамп дурджээ.

Зеленский уулзалтын дараах хэвлэлийн бага хурлын үеэр хэлэхдээ "Аюулгүй байдлын баталгааны хүрээнд АНУ, Украины хооронд 90 тэрбум ам.долларын зэвсгийн худалдаа хийгдэнэ. Украинд байдаггүй зэвсгүүд үүнд багтах болно" гэсэн юм.

Дашрамд дурдахад, хоёрдугаар сард Цагаан ордонд болсон "гашуун" уулзалтаас сургамж авсан Зеленский энэ удаад илүү бодолтой үзжээ. Тодруулбал, тэр уулзалтын эхний хэдэн минутад зургаан удаа "баярлалаа" гэдэг үгийг хэлсэн байна. Өмнөх уулзалтаар дэд ерөнхийлөгч Ж.Д Вэнс түүнийг талархал илэрхийлж мэддэггүй гэж шүүмжилсэн билээ.

Түүнчлэн Зеленский энэ удаад уламжлалт цэргийн хувцсаа бус хар хүрэм өмссөн байв.

Мөн тэрбээр илүү гэр бүлийн чанартай харилцаа тогтоох хүчин чармайлтын хүрээнд Украины тэргүүн хатагтай Олена Зеленскагийн захидлыг АНУ-ын тэргүүн хатагтай Меланиа Трампад дамжуулан өгчээ.

Уулзалтын өмнө Европын удирдагчид Трампад талархлаа илэрхийлж, энэ уулзалтыг зохион байгуулахад хүчин чармайлт гаргасан гэж сайшаажээ. Тухайлбал, НАТО-ийн тэргүүн Марк Рутте "Таны манлайлалд маш их баярлалаа" гэсэн бол Италийн ерөнхий сайд Жоржиа Мелони "Оросуудад энх тайвныг хүсч байгаа ямар ч шинж тэмдэг байгаагүй. Гэхдээ Трамп таны ачаар өөрчлөлт гарч байна" гэсэн юм.

Энэ мэтчилэн халуун дулаан үгс байсан ч гэлээ Европын удирдагчид ирээдүйд Оросын түрэмгийллийн бай болж магадгүй гэх айдсаа ч мөн илэрхийлэв. Францын ерөнхийлөгч Эммануэль Макрон "Аюулгүй байдлын баталгааны тухай хэлбэл, бид Европ тивийн аюулгүй байдлын асуудлыг ч бас ярьж байна гэсэн үг" гэжээ.