Талибанчууд засгийн эрхэнд гарсны дөрвөн жилийн ойгоо тэмдэглэн, нисдэг тэрэгнээс цэцэг тараан шиджээ. Энэ баярт үйл явдлыг харахаар Кабул даяар олон мянган эрчүүд Баасан гаригт /2025.08.15/ цугласан байна. Нийт зургаан байрлалд цэцгэн бороо оруулсны гуравт нь эмэгтэйчүүд нэвтрэх хориотой байсан. Эдгээр нь 2022 оны арваннэгдүгээр сараас хойш эмэгтэйчүүдийг нэвтрэхийг хориглосон цэцэрлэгт хүрээлэн, амралт зугаалгын газрууд юм.

АНУ 2021 оны наймдугаар сарын 15-нд Афганистанаас цэргээ татан гаргаснаар талибанчууд засгийн эрхэнд гарсан. Тэр цагаас хойш тэд удирдагч Хибатулла Ахундзадагийн зарлигийн үндсэн дээр исламын шашны хууль тогтоомжийг өдөр тутмын амьдралд хэрэгжүүлэх болжээ. Энэ хүрээнд охид эмэгтэйчүүдийн эрх ихээр хязгаарлагдах болсон.

Баасан гаригт болсон баярын хөтөлбөр тэр чигээрээ эрчүүдэд зориулагдсан байв.

Эмэгтэйчүүд ихэнх ажлын байранд ажиллах боломжгүй, зургадугаар ангиас дээш боловсрол эзэмших эрхгүй байгаа зэрэг нь НҮБ тэргүүтэй олон улсын байгууллагуудын шүүмжлэлийг хүлээсээр байна.

Тэгвэл Афганистаны эмэгтэйчүүдийн эрх чөлөөний төлөөх нэгдсэн хөдөлгөөний гишүүд энэ өдөр зүүн хойд нутгийн Тахар мужид Талибаны дэглэмийг эсэргүүцсэн жагсаал зохион байгуулжээ. Эмэгтэйчүүд энэ өдрийг өнгөрсөн түүхийн ил шарх гэж үзэж байна. Мөн нийслэл Исламабад хотод эсэргүүцлийн жагсаал болжээ. Исламабад дахь эмэгтэйчүүд “Талибанчуудыг уучлах нь хүн төрөлхтний эсрэг дайсагнасан үйлдэл”, “Наймдугаар сарын 15 бол хар өдөр" гэсэн уриа лоозон барьсан байв.