Япон улс Дэлхийн II дайн дууссаны ойн дурсгалт арга хэмжээ зохион байгуулж байна. 1945 оны наймдугаар сарын 15-ны өдөр дэлхий даяар Япон улс бууж өгсөн талаарх мэдээг хүлээн авсан өдөр юм. Эзэн хаан Нарухито дурсгалын арга хэмжээний үеэр дайны үеэр болон дайны дараа хүмүүсийн туулсан зовлон бэрхшээлийн талаарх түүхийг хойч үедээ уламжлуулан хүргэж байхыг хүсэж байгаагаа илэрхийлсэн юм. Токио хотод болсон "Улсын дайнд амь үрэгдэгсдийн дурсгалыг хүндэтгэх ёслол"-д дөрвөн мянга гаруй хүн, тэдний дунд амь үрэгдэгсдийн ар гэрийнхэн оролцжээ. Дэлхийн II дайнд хуучин эзэнт гүрний цэргийн алба хаагчид бүхий 2.3 сая хүн амь үрэгдсэн байна. Мөн 800 мянга орчим энгийн иргэн амь насаа алдсан байна.

Ёслолын үеэр оролцогчид өдрийн 12:00 цагт нэг минут дуугүй байж, хүндэтгэл үзүүлсэн байна. Эзэн хаан Нарухито, хатан Масако нар амь үрэгдэгсдийн сүнсийг тайвшруулахын төлөө залбирчээ. Эзэн хаан хэлэхдээ "Дайны төгсгөлөөс хойш 80 жил өнгөрчээ. Манай улс өнөөдөр энх тайван, хөгжил цэцэглэлтийн үр шимийг хүртэж байна. Энэ бүхэн бол ард иргэдийн уйгагүй хүчин чармайлтын үр дүн юм. Ард түмний туулсан зовлон бэрхшээлийг эргэн дурсахад сэтгэл гүнээ хөдөлж байна. Дайны үеэр болон дайны дараа туулсан зовлон бэрхшээлүүдийн талаарх түүхүүдийг хойч үедээ уламжлан хүргэж, ирээдүйд энх тайван, ард түмний аз жаргалыг эрэлхийлсээр байх нь миний чин сэтгэлийн хүсэл юм" хэмээв.

Ёслолд оролцсон ар гэрийнхний олонх нь 80-аас дээш настай байжээ. Мөн 18-аас доош насны залуу хойч үеийн төлөөлөл арга хэмжээнд оролцсон нь дайны бэрхшээлийн талаарх түүхийг цаашид уламжлан хүргэх зорилготой байв.